Երևանի քաղաքապետ Գագիկ Բեգլարյանը շուտով հրաժեշտ կտա իր պաշտոնին։
Իշխանական կուլիսներում երեկ ակտիվորեն քննարկվում էր Երևանի քաղաքապետ Գագիկ Բեգլարյանի և նախագահականի արարողակարգի ծառայության աշխատակից Արամ Կանդայանի միջև տեղի ունեցած միջադեպը: Ըստ շրջանառվող լուրերի՝ այս միջադեպը լցրել է Սերժ Սարգսյանի համբերության բաժակը, և հավանական է, որ շատ շուտով Բեգլարյանը հրաժարական ներկայացնի: Նույնիսկ քննարկվում է Երևանի հաջորդ քաղաքապետի անունը. ամենայն հավանականությամբ, դա լինելու է ներկայիս փոխքաղաքապետ, ՀՀԿ խորհրդի անդամ Տարոն Մարգարյանը` վաղամեռիկ Անդրանիկ Մարգարյանի որդին:
Ի դեպ, երեկ օրվա երկրորդ կեսին Երևանի փոխքաղաքապետ Տարոն Մարգարյանը եղել է նախագահական նստավայրում: Թե ինչ է քննարկվել՝ մեզ կոնկրետ տեղեկանալ չհաջողվեց, սակայն դժվար չէ կռահել, որ հիմնականում խոսքը վերաբերել է տեղի ունեցած միջադեպին:
Ի դեպ, քիչ առաջ նախագահական նստավայրից մեզ հետ զրույցում հաստատեցին, որ նման միջադեպ իրոք տեղի է ունեցել:
