Իրանական Parsine լրատվական կայքի հաղորդմամբ՝ Իրանի համակարգի նպատակահարմարությունը բնորոշող խորհրդի աշխատանքային շրջանը ավարտվելու է հաջորդ տարվա փետրվարին, և դա՝ այն պայմաններում, որ արդեն խորհրդի նախագահ Այաթոլլահ Հաշեմի Ռաֆսանջանին հեռացվել է բանիմացների խորհրդից, իսկ խորհրդի այլ ազդեցիկ անդամ Միր Հուսեյն Մուսավին լրիվ դուրս է դրվել պետական համակարգից:
Կայքի հաղորդմամբ. «Համակարգի նպատակահարմարությունը բնորոշող խորհրդի նոր շրջանը համընկնելու է խորհրդարանի 9-րդ նստաշրջանի ընտրությունների հետ, և կարելի է այդ ժամանակահատվածը շատ կարևոր համարել Իրանի քաղաքական ուժերի վերադասավորման խնդրում:
Հաշեմի Ռաֆսանջանիի բացակայությունը խորհրդի հաջորդ շրջանում նշանակելու է, թե վերջ է դրվելու նրա քաղաքական ողջ կարիերային: Համակարգի նպատակահարմարությունը բնորոշող խորհրդի հաջորդ նստաշրջանի կարևորագույն քննարկելիք թեման Սահմանադրության փոփոխությունն ու երկրի վարչակարգը խորհրդարանական դարձնելու հարցն է, որտեղ, եթե բացակա լինի Հաշեմի Ռաֆսանջանին, արդեն հնարավորություն չի ունենա ազդել երկրի ապագայի համար կարևոր հարցերի վրա»։
Հիշեցնենք, որ ամիսներ առաջ պահպանողական մի շարք ազդեցիկ պաշտոնյաների ճնշումների արդյունքում Հաշեմի Ռաֆսանջանին բանիմացների խորհրդի նախագահությունը թողեց իր մրցակցին և հրաժարվեց մասնակցել խորհրդի ընտրություններին:
Այս պահին էլ, երբ իր ավարտին է հասնում համակարգի նպատակահարմարությունը բնորոշող խորհրդի նստաշրջանը, առաջնորդի մի շարք կողմնակիցներ հրապարակավ քննադատություններ են հնչեցնում Հաշեմի Ռաֆսանջանիի և նրա գլխավորած խորհրդի հասցեին և պահանջում են իսպառ վերացնել նպատակահարմարությունը բնորոշող խորհուրդը:
Հատկանշական է, որ օրեր առաջ Հաշեմի Ռաֆսանջանին բացահայտ քննադատեց առաջնորդին ու նրա հնչեցրած տեսակետը ապագայում Իրանի վարչակարգը խորհրդարանական դարձնելու շուրջ: