Ինչպես տեղեկացնում է «Առաջին լրատվական»-ը, 2011թ. սեպտեմբերին ԱՄՆ միջազգային զարգացման գործակալությունը (ԱՄՆ ՄԶԳ) և Հայկական ակնաբուժության նախագիծը (ՀԱՆ) նշել են Գլոբալ զարգացման միավորման շրջանակում իրականացվող «Լույս հայի աչքերին. Առաջնային և ակնաբուժական առողջապահական դաշինք» յոթնամյա գործընկերության ավարտը:
Հայկական ակնաբուժության նախագիծը (ՀԱՆ) ամերիկահայ ակնաբույժ Ռոջեր Օհանեսյանի կողմից 1992 թվականին ԱՄՆ-ում հիմնադրված բարեգործական կազմակերպություն է, որի առաքելությունն է կանխարգելել ձեռքբերովի կուրությունը Հայաստանում և ակնային ծառայությունները հասանելի դարձնել բոլոր հայաստանցիներին:
2003-ից ՀԱՆ-ը սկսել է իր «Լույս հայի աչքերին» նախաձեռնությունը և 2004թ. համագործակցել ԱՄՆ ՄԶԳ-ի հետ` իրականացնելով «Առաջնային և ակնաբուժական առողջապահական դաշինք» համապարփակ ծրագիրը:
ՀԱՆ-ն աշխատել է Հայաստանի տասը մարզերում և օգտագործել չորս ռազմավարական ուղղություններ կանխարգելի կուրության դեմ պայքարում`անմիջական բուժօգնություն, բժշկական ուսուցում և վերապատրաստում, հանրային ուսուցում և իրազեկում, տվյալների հավաքագրում և հետազոտական աշխատանքներ:
ՀԱՆ-ի բժշկական խմբերը և ժամանակակից սարքավորումներով հագեցած Աչքի շարժական հիվանդանոցը աշխատել են Հայաստանի մարզերում` բնակչությանը տրամադրելով բարձրորակ ակնաբուժական ծառայություններ: Ներգրավվել է Հայաստանի համայնքների 90%-ը (841), հիմնականում գյուղական համայնքներ, որտեղ ակնաբուժական ծառայությունները պակաս հասանելի են:
ԱՄՆ ՄԶԳ և ՀԱՆ համատեղ ջանքերը «Առաջնային և ակնաբուժական առողջապահական դաշինք» ծրագրի ներքո հանգեցրել են բազմաթիվ նշանակալի ձեռքբերումների: 2004թ. ծրագրի սկզբից ի վեր ՀԱՆ-ը հետազոտել է ավելի քան 245 000 մարդու: Աչքի շարժական հիվանդանոցում իրականացվել է մոտ 10 000 վիրահատություն և լազերային բուժում, անապահովներին բաժանվել է 36 000 ակնոց:
ՀԱՆ-ը հեղինակել և հրատարակել է երկու գիրք առաջնային օղակի բուժաշխատողների և ակնաբույժների համար, մշակել և հրատարակել է 13 անուն տեղեկատու գրքույկ ակնային հիվանդությունների, աչքի խնամքի և անվտանգության մասին` 602 հազար օրինակով: Մոտ 12 000 դպրոցական և 850 ծնող/ մեծահասակ մասնակցել են ՀԱՆ-ի հանրային իրազեկման դասընթացներին մարզերում և Երևանում:
2006թ. ՀԱՆ-ը, Քանաքեռ-Զեյթուն բժշկական կենտրոնի հետ համատեղ հիմնադրել և սարքավորումներով հագեցրել է Թույլ տեսողության կենտրոնը:
ՀԱՆ-ը հիմնադրել է Ուսուցման և ախտորոշման կենտրոնը`Մալայանի անվան ակնաբուժական կենտրոնի հետ համատեղ: 2007թ. «Փֆայզեր» ընկերության նվիրատվության շնորհիվ ՀԱՆ-ը ներմուծել է վիրաբուժական հմտությունների զարգացման լաբորատորիա (Wet lab), որտեղ Հայաստանի երիտասարդ ակնաբույժները և ուսանողները կարող են կատարելագործել իրենց կիրառական հմտությունները:
ՀԱՆ-ը նախաձեռնել և կազմակերպել է երեք միջազգային ակնաբուժական համաժողով Երևանում:
ՀԱՆ-ը տպավորիչ աշխատանք է կատարել միջազգային և տեղական ֆինանսավորման օգնության ներգրավման հարցում, որոնք օգտագործվել են Հայաստանում ակնային ծառայությունները կատարելագործելու համար:
ՀԱՆ-ը կշարունակի իր աշխատանքները բուժաշխատողների առցանց վերապատրաստման գործում, կընդլայնի անհասության ռետինոպաթիայի ծրագիրը, կիրականացնի բժշկական խմբերի և Աչքի շարժական հիվանդանոցի հինգերորդ շրջայցը Հայաստանի մարզերում:
