«Դուք պիտի գնաք Տիգրան Սարգսյանի մոտ, ասեք՝ ա՛յ ընկեր, քեզ ո՞վ է թույլ տվել, դու կարող ես վատ վարչապետ լինել, բայց ցինիկ լինելու իրավունք քեզ ո՞վ է տվել: ՀՀ քաղաքացին, անկախ հայացքներից, պիտի ասի՝ ես ցինիկներին դեմ եմ»,- այսօր ասուլիսում հայտարարեց ՀԱԿ ներկայացուցիչ, ՀՀ նախկին վարչապետ Հրանտ Բագրատյանը՝ նշելով, որ Doing Business-ի ցուցանիշները Տ. Սարգսյանը վատացրել է դեռ 2007-ին, իսկ վերջին տարին մի քիչ լավացել է. «6 ցուցանիշով վատացել է, 4-ով՝ լավացել»:
Հ. Բագրատյանի խոսքով` մրցունակության ինդեքսով Հայաստանը 98-րդ տեղից բարձրացել է 92-րդ տեղը, բայց 3 տարի առաջ 74-րդից էր գնացել 98-րդ: ՀՆԱ ցուցանիշով ՀՀ-ն 140-րդն է՝ 183 երկրների մեջ. «Այնտեղ, որտեղ վատացում ունենք, ի՞նչ իրավունք ունի ասի՝ լավացում կա: Գոնե լռի»:
Անդրադառնալով ԲՀԿ-ՀՀԿ հակասություններին՝ Հ. Բագրատյանը կարծիք հայտնեց, որ ԲՀԿ-ն կոալիցիայից դուրս չի գալիս, որովհետև բիզնեսը ձեռքից կվերցնեն. «Հայաստանում բիզնես չկա, դա նաև ցույց է տալիս, որ գործարար չկա: Այդ հարթությունը չի ստեղծված գործարարության հիման վրա: Ստեղծված է պետական իշխանությունը կապիտալի վերածելու մեխանիզմի վրա: Եվ իրենք գիտեն, որ հարկային ստուգման դեպքում՝ ի՞նչ բիզնես, ի՞նչ բան: Ինչպես Սուքիասյաններին արեցին, բիզնեսը ձեռքից առնում են: Հայաստանում չկա իրավական պետություն»:
Անդրադառնալով ՀԱԿ-ի գործունեությանը՝ Հ.Բագրատյանը փաստեց, որ Սերժ Սարգսյանի հրաժարականը ՀԱԿ-ը միշտ է պահանջել. «Երկխոսությունը ցույց տվեց, որ կոալիցիան ի վիճակի չէ որևէ քայլ քննարկելու: Հոկտեմբերի 28-ին մի քանի առաջարկ կանեմ Սերժ Սարգսյանին, որից ինքը չի կարող հրաժարվել»:
