Ռուսական Regnum լրատվական գործակալության փոխանցմամբ՝ Ադրբեջանի արտգործնախարար Էլմար Մամեդյարովը երեկ Комсомольская правда-ին տված իր հարցազրույցում անդրադարձել է նաև Ղարաբաղյան հակամարտության կարգավորման գործընթացում Ռուսաստանի դերակատարությանը («Առաջին լրատվական»-ը երեկ ներկայացրել էր ադրբեջանական լրատվամիջոցներում տեղ գտած Մամեդյարովի հարցազրույցի մի մասը)։
Ռուսաստանի դերակատարության հետ կապված՝ Մամեդյարովը նշել է. «Ռուսաստանը եղել է, կա և կլինի Կովկասում։ Հարավային Կովկասը Կովկասի բաղկացուցիչ մասն է։ Ռուսաստանն առաջին օրվանից շատ ներդաշնակորեն աշխատել է սկզբնական շրջանում հակամարտությունը մարելու, ապա նաև շփման եզրեր գտնելու ուղղությամբ։ Պետք է արժանին հատուցել Ռուսաստանին, որը նպաստեց Լեռնային Ղարաբաղում զինադադարի կնքմանը։
Վլադիմիր Պուտինն ի սկզբանե՝ 2004 թվականից, երբ մենք սկսեցինք փարիզյան գործընթացը, ներգրավվել է Ղարաբաղյան հակամարտության կարգավորման գործընթացում՝ կազմակերպելով Հայաստանի և Ադրբեջանի նախագահների հանդիպումներ։ Ես հիշում եմ, որ Աստանայում Պուտինը երկարատև զրույց ունեցավ նախագահ Իլհամ Ալիևի հետ։ Այդ ժամանակ Հայաստանի նախագահը Ռոբերտ Քոչարյանն էր։ Նրանք երեքով ինտենսիվ կարծիքներ փոխանակեցին խնդրի շուրջ։
Դա նշանակում է, որ Ռուսաստանի վարչապետն անմիջականորեն իրազեկված է խնդրի էությունից։ Ռուսաստանը եղել է, կա և կլինի Կովկասում մեր հարևանը»։
Հիշեցնենք, որ Մամեդյարովն իր հարցազրույցում իր երկրի համար առաջնային էր համարել Լեռնային Ղարաբաղին հարակից 7 շրջաններից հայկական զորքերի դուրս բերումը՝ ընդգծելով, որ դա շատ բան կփոխի։
