Ադրբեջանական ANS PRESS-ի փոխանցմամբ՝ Ադրբեջանի նախագահ Իլհամ Ալիևը նախարարների կաբինետի նիստում ունեցած իր ելույթում անդրադարձել է Ղարաբաղյան հակամարտության կարգավորմանը.
«Ադրբեջանի տարածքային ամբողջականությունը չի կարող լինել բանակցությունների քննարկման առարկա։ Թեև բանակցություններն արդյունք չեն տվել, այնուամենայնիվ, վերջին ամիսներին միջազգային միջնորդների հնչեցրած այն կարծիքը, որ ստատուս քվոն անընդունելի է, հույս է ներշնչում։ Այսինքն՝ ստատուս քվոն անընդունելի է, այն պետք է փոխվի, հակամարտությունը չի համարվում «սառեցված», հայկական զորքերը «պետք է» դուրս բերվեն «օկուպացված» տարածքներից։
Մեր ռազմական հնարավորությունները վկայում են, որ Հայաստանի ու Ադրբեջանի միջև տարբերությունն ավելի է մեծանում, ինչպես «երկինքն ու երկիրը»։ Այս մասին գիտեն բոլորը։ Ինչ վերաբերում է ռազմական հավասարակշռությանը, ապա մինչև վերջերս հայկական կողմի «քարոզչության» արդյունքում այդ տարբերությունը, այսինքն՝ մեր գերակշռությունը, այնքան էլ նկատելի չէր միջազգային կառույցների ու դիտորդների համար։ Սակայն վերջին շրջանում Ադրբեջանում ու Հայաստանում իրականացված ռազմական շքերթներն ակնհայտորեն «ցույց տվեցին», թե ով ով է։
Հայաստանում ռազմական շքերթ անցկացնելը հայկական կողմի «մեծ սխալն» էր, քանի որ եթե մինչ այդ նրանք «միֆերի կամ երևակայության» միջոցով փորձում էին համոզել, որ հայկական բանակն ամենամարտունակն է տարածաշրջանում, ապա այդ ռազմական շքերթը «ցույց տվեց», թե ինչ «տխուր» վիճակում է հայկական բանակը։
Ես և դուք տեսաք, որ նրանց ռազմական տեխնիկան «ի վիճակի չէ» անձամբ շարժվել, նրանց շքերթի ժամանակ ցուցադրել են քարշակներով ու բեռնատարներով։ Դա կարող է ունենալ մի քանի պատճառ։ Կա՛մ այդ տեխնիկան «չի աշխատում» և գտնվում է «անսարք» վիճակում, կա՛մ այն «չունի վառելիք», կա՛մ էլ «երկու պատճառը» միասին։ Այդ շքերթը հերթական անգամ ցույց տվեց, որ Հայաստանն «անկախ պետություն չէ, ամրակետ է»։
Այդ շքերթը պատմության մեջ կհիշվի միայն մեկ նորարարությամբ, որ դրան մասնակցել են նաև կրոնական գործիչները, ինչը, մեղմ ասած, զարմանք է հարուցում»։
Հիշեցնենք, որ այս տարվա հունիսի 26-ին Բաքվում տեղի ունեցած ռազմական շքերթին մասնակցել է 6000 զինծառայող և 400 միավոր տեխնիկա, իսկ սեպտեմբերի 21-ին Երևանում տեղի ունեցած շքերթին՝ 4000 զինծառայող և 300 միավոր տեխնիկա։
