ԱՄՆ հանրապետական սենատոր, 2008 թվականի ընտրություններում նախագահի թեկնածու Ջոն Մըքքեյնը գտնում է, որ ԱՄՆ-ը չպետք է իր զորքերը դուրս բերի Իրաքից, և դեռևս հնարավոր է համաձայնություն ձեռք բերել այդ երկրում ամերիկացի զինվորականների կարգավիճակի վերաբերյալ:
ԱՄՆ նախագահ Բարաք Օբաման հոկտեմբերի 21-ին հայտարարել է, որ իր վարչակարգը որոշում է կայացրել 2011 թվականից հետո Իրաքում զորքեր չպահել, և նրանց Իրաքից դուրս բերել մինչև այս տարվա դեկտեմբերի վերջը: Ինչպես Սպիտակ տնից ավելի ուշ պարզաբանել են, այսպիսի որոշումը կայացվել է այն բանից հետո, երբ իրաքյան իշխանությունների հետ՝ ամերիկացի զինվորականների ներկայությունը պահպանելու մասին բանակցությունները հաջողությամբ չեն պսակվել:
«Իրաքցիները պատրաստ էին բանակցություններին: ԱՄՆ-ը, սակայն, դեռ չուներ հստակ պլան, թե իրականում քանի զինվոր էր նախատեսում թողնել Իրաքում»,- ասել է Մըքքեյնը АВС հեռուստաընկերությանը տված հարցազրույցի ժամանակ:
Սենատորը նշել է նաև, որ ինքը մի քանի շաբաթ առաջ գնացել է Իրաք և հանդիպում ունեցել երկրի ղեկավարների հետ: Ըստ նրա` այդ ժամանակ Իրաքի քաղաքական գործիչները պատրաստ էին երկխոսության, ինչպես նաև պատրաստ էին քննարկել ամերիկյան զորքերի մնալու հարցը:
