Ադրբեջանական APA լրատվական գործակալության փոխանցմամբ՝ հոկտեմբերի 26-28-ը Բաքվում տեղի է ունենալու ԱՊՀ երկրների անվտանգության մարմինների ու հատուկ ծառայությունների խորհրդի նիստը։ Այս մասին հայտարարել է ԱՊՀ գործադիր կոմիտեի մամլո ծառայությունը։
Նիստի օրակարգում են լինելու մոտ 20 հարցեր, որոնց թվում են ԱՊՀ տիրույթում նաև կրոնական ծայրահեղության, ահաբեկչության, ապօրինի ներգաղթի, թմրանյութերի շրջանառության դեմ պայքարին առնչվող հարցերը։
Բացի այդ, նիստում քննարկվելու են հակաահաբեկչական զորավարժությունների անցկացման արդյունքները և 2012 թվականին պլանավորված ԱՊՀ հակաահաբեկչական կենտրոնի միջոցառումների հարցը։ Ակնկալվում է, որ նիստին մասնակցելու է նաև ԱՊՀ գործադիր կոմիտեի նախագահ Սերգեյ Լեբեդևը։
Հիշեցնենք, որ ԱՊՀ երկրների անվտանգության մարմինների ու հատուկ ծառայությունների խորհուրդը ստեղծվել է 1997 թվականին։ Դրա հիմնական նպատակը միջազգային բնույթի կազմակերպված հանցավորության դեմ պայքարի ոլորտում ԱՊՀ երկրների արդյունավետ համագործակցությունն է։