Ճապոնական Տիբա պրեֆեկտուրայում, որը գտնվում է Տոկիոյի հարևանությամբ, հայտնաբերվել է ճառագայթման բարձր մակարդակով «թեժ» կետ, որը 164 անգամ գերազանցում է նորման: Այս մասին հաղորդում է mignews.com կայքը:
Սկզբում մասնագետները քիչ հավանական են համարել, որ ճառագայթման բարձր մակարդակը տվյալ շրջանում կապված է «Ֆուկուսիմա 1»-ի վթարի հետ, քանի որ վերլուծության համար հող էին վերցրել 30 սանտիմետր խորությունից:
Այնուամենայնիվ, հողի հետազոտությունը ցույց է տվել ռադիոակտիվ ցեզիումի մեծ պարունակություն: Սրա հետ կապված՝ Ճապոնիայի գիտության և տեխնիկայի նախարարությունում չեն բացառում, որ սա «Ֆուկուսիմա 1»-ի վթարի հետևանքն է, քանի որ հիմնական ռադիոակտիվ տարրը, որը կայանից դուրս է նետվել, հենց ցեզիումն է եղել: