Մարդահամարի 10 օրն արդեն անցյալում է, սակայն դեռ կան քաղաքացիներ, որոնք առայժմ «չեն զգացել հաշվառված լինելու հաճույքը»: Այսօրվանից սկսվել է մարդահամարի 10 տոկոսանոց ընտրանքային վերահսկիչ շրջայցը հրահանգիչ-հսկիչների հետ, որը տևելու է հինգ օր: Սրա նպատակն է հենց այդ չհաշվառված մարդկանց գտնելը:
Ազգային վիճակագրական ծառայության Մարդահամարի և ժողովրդագրության վարչության պետ Կարինե Կույումջյանը «Առաջին լրատվական»-ին հայտնեց, որ ընտրանքային ստուգումներից հետո հանդես կգան հայտարարություններով, հեռախոսահամարներ կտան, որպեսզի այն մարդիկ, ում չի հաջողվել հաշվարարի հետ հանդիպել, կարողանան տեղեկատվությունը փոխանցել. «Դրանք գործառույթներ են, որ մեկը մյուսին հաջորդում են: Շատերը կան, որ զանգահարել են այս ընթացքում, մի քանի տուն ունեն, ասում են որտեղ են, և հաշվարարը գնում է այնտեղ: Այսօր բնակիչները տարբեր ժամերի աշխատում են, հաշվարարները գնում են մի քանի անգամ ու չեն գտնում: Դրա համար փորձում ենք տարբեր ճանապարհներով ամբողջականության հարցը լուծել»:
Ըստ Կ.Կույումջյանի՝ բոլոր գործակալությունները, օպերատիվ շտաբները աշխատում են, հաշվարարները դուրս են եկել վերահսկիչ այցերի, ԱՎԾ-ն հետևում է անգամ լրագրողների հրապարակումներին՝ պարզելու համար, թե որտեղ կա խնդիր:
«Շնորհակալ կլինենք այն մարդկանց, ովքեր մեզ կաջակցեն, որ այդ դժվար ու խրթին հարցը լուծենք, մարդկանց, որոնց դժվար է տանը հանդիպել, արագ կարողանանք ամբողջականացնել»:
Հիշեցնենք, որ 2012 թ. փետրվարին կհրապարակվեն մարդահամարի նախնական հավաքագրված տվյալները, իսկ սեպտեմբեր-հոկտեմբեր ամիսներին արդեն հայտնի կլինեն մշտական և առկա բնակչության նախնական ցուցանիշները:
