Լոռու մարզի Գեղամասար համայնքի միջնակարգ դպրոցը կառուցվել է 1988-ի երկրաշարժից հետո: Ներկայում այնտեղ ուսանում է 97 աշակերտ: Դպրոցի տնօրեն Վազգեն Ղուկասյանը գյուղ այցելած մի խումբ լրագրողներին հայտնեց, որ այս տարի առաջին դասարան է ընդունվել 8 երեխա, բայց հաջորդ տարի միայն 2 երեխա է ընդունվելու:
«Վերջին տարիներին 8 աշակերտից ավելի չի եղել: Ժողվուրդն աշխատանք չունի, գյուղը լեռնային է՝ բերքատվությունը՝ վատ: Օրինակ՝ Ղարաբաղում խրախուսում են երեխաների ծնունդը, իսկ մեզ մոտ ոչինչ չի արվում: 1 կամ 2 երեխա է ընտանիքներում, բայց որ կառավարությունն աջակցեր, ավելի շատ երեխաներ կունենային: 5 տարի առաջ 215 աշակերտ եմ ունեցել, 3 տարի առաջ՝ 126, այսօր՝ 97»,- ասաց Վ. Ղուկասյանը:
Նրա խոսքով՝ անցած տարիներին գյուղից շատ ընտանիքներ են հեռացել, օրինակ՝ Վանաձոր քաղաքում 2 թաղամաս միայն իրենց գյուղից են:
Վ. Ղուկասյանը տեղեկացրեց, որ անցած տարի պետբյուջեից հատկացված գումարներով դպրոցը գազաֆիկացվել է, ջեռուցման կաթսաները տեղադրված են, և ձմռանը դասասենյակներում նորմալ ջերմաստիճանն ապահովում են: Մասնագետների 19 ուսուցիչներից 17-ը բարձրագույն մասնագիտական կրթություն ունեն:
Ամեն տարի հոկտեմբերի 21-ին Գեղամասարի դպրոցականները նշում են «Ոսկե աշուն» տոնը: Վ. Ղուկասյանը նշեց, որ կազմակերպում են միջոցառում, երեխաները եղած բերք ու բարիքով զարդարում են սեղանները, ելույթներ ունենում, իսկ ժյուրին էլ գնահատում ու պարգևատրում է նվերներով:
