Թուրքական Star թերթի փոխանցմամբ՝ Սաուդյան Արաբիայի իշխանությունները որոշել են երկրից վտարել 3 միլիոն օտարազգիների, այդ թվում՝ նաև Թուրքիայի 30,000 քաղաքացիների։ Որոշումն ընդունվել է գործազրկության դեմ պայքարի շրջանակներում։
Այս տարվա հուլիսի տվյալներով, Սաուդյան Արաբիայում գործազրկությունը հասել է 10.8 տոկոսի։ Դրա հետ կապված՝ սաուդյան իշխանությունները սկսել են գործազրկության դեմ պայքար մղել, ինչը ենթադրում է նաև Սաուդյան Արաբիայի քաղաքացիներին պետական պոստերում նշանակման ավելացում։
Սաուդյան Արաբիայում գործող մի շարք թուրքական խոշոր ընկերություններ արդեն հայտնել են իրենց մտահոգությունը՝ վստահեցնելով, որ տեղաբնակները, թուրքական ընկերություններում աշխատող թուրքերի համեմատ, այդքան էլ արհեստավարժ ու աշխատունակ չեն։
Սաուդյան Արաբիայի բնակչությունը կազմում է 18.7 միլիոն մարդ, որից 8 միլիոն 42 հազարը՝ 31 տոկոսը, օտարազգիներ են։
