ՀԱԿ ակտիվիստ Վարդգես Գասպարիի ձերբակալությունը ոստիկանության կողմից գործադրված սովորական ճղճիմ վրեժխնդրություն էր. «Առաջին լրատվական»-ի հետ զրույցում երևույթն այս կերպ բնութագրեց «Ժողովրդավարական հայրենիք» կուսակցության նախագահ, Հայ ազգային կոնգրեսի ներկայացուցիչ Պետրոս Մակեյանը:
«Վարդգես Գասպարին ոստիկանության կոկորդին կանգնած ոսկոր է, որին ուզում են մարսել: Սա իրենց ճանապարհին խնդիրներ հարուցող մարդկանցից մեկին մեկուսացնելու դեպք է»,- նկատեց Մակեյանը` հավելելով, որ ՀԱԿ ակտիվիստը մեկն էր այն քիչ մարդկանցից, ովքեր մշտապես պայքարում և փորձում են կանխել ոստիկանության ապօրինությունները:
Հիշեցնենք, որ բանակում խաղաղ պայմաններում մահացած զինվորների ծնողների՝ կառավարության շենքի մոտ անցկացվող բողոքի ցույցին մասնակցող Հայ ազգային կոնգրեսի ներկայացուցիչ Վարդգես Գասպարին բռնության գործադրմամբ երեկ տեղափոխվել էր ՀՀ ոստիկանության քննչական բաժին և ապօրինաբար ձերբակալվել։
Հայ ազգային կոնգրեսը դատապարտում է ոստիկանության ապօրինի պահվածքը՝ համարելով, որ Վարդգես Գասպարիին կալանքի տակ առնելու որոշումը կայացվել է անձամբ ոստիկանապետի կողմից։ Ինչպես և Տիգրան Առաքելյանի դեպքում՝ Ալիկ Սարգսյանը, հակառակ օրենքի պահանջի, իրեն թույլ է տալիս ներքաշվել քաղաքական գործընթացների մեջ և վրեժխնդիր լինել իրեն քննադատող քաղաքական և քաղաքացիական ակտիվիստներից։
Հայ ազգային կոնգրեսը պահանջում է անհապաղ ազատ արձակել Վարդգես Գասպարիին և պատժել ոստիկանության այն ներկայացուցիչներին, ովքեր օրենքի խախտմամբ ազատազրկել են նրան։
