Грузия Online փոխանցմամբ՝ Վրաստանում տեղի ունեցած «Վարդերի հեղափոխությանը» հաջորդած ժամանակաշրջանում տեղեկատվություն էր տարածվել, թե հայտնի ֆինանսիստ Ջորջ Սորոսը ֆինանսապես օգնում է Վրաստանի իշխանություններին։ Ռուսաստանը ցայժմ դժգոհում էր այդ կապակցությամբ՝ ընդգծելով, որ Վրաստանի իշխանությունները գումարներ են ստանում ամերիկացի գործարարից։
Այս կապակցությամբ վրացի միլիարդատեր Բիձինա Իվանիշվիլին տեղական լրագրողներից մեկին տված հարցազրույցի ժամանակ խոստովանել է, որ «այդ Սորոսն» ինքն էր, քանի որ այն ժամանակ հենց ինքն է ֆինանսավորել վրացական իշխանություններին և լցրել բյուջեն.
«Սկզբում ես ամեն կերպ աջակցում էի նրանց՝ խորհուրդներով, ֆինանսներով։ Այդ ժամանակ ես նրանց ասում էի դուք միայն վերջ դրեք կոռուպցիային և կարգուկանոն հաստատեք, և ես ձեզ կօգնեմ ամեն անհրաժեշտ բանով։ Երբ հասարակությունը կարծում էր, թե կառավարությանը ֆինանսավորում է Սորոսը, իրականում այդ գումարները հիմնականում վճարում էի ես»։
Հիշեցնենք, որ Վրաստանում «Վարդերի հեղափոխությունը» տեղի է ունեցել 2003 թվականի նոյեմբերի 2-4-ին։ Հեղափոխության հիմնական մոտիվը 2003 թվականի նոյեմբերի 2-ի խորհրդարանական ընտրությունների կեղծումն էր։ «Վարդերի հեղափոխության» արդյունքում Վրաստանի նախագահ Էդուարդ Շևարդնաձեն վայր դրեց իր լիազորությունները, և երկրի ղեկավարությունն անցավ ընդդիմադիրներին, որոնց գլխավորում էր Միխեիլ Սաակաշվիլին։
