Վաղը մարդահամարի անցկացման վերջին օրն է: Ինչպես «Առաջին լրատվականին» հայտնեց Ազգային վիճակագրական ծառայության Մարդահամարի և ժողովրդագրության վարչության պետ Կարինե Կույումջյանը, ընթացքը նորմալ է, աշխատանքներն իրենց հունով գնում են, ծագող խնդիրներն ընթացքում լուծվում են, ԱՎԾ-ն նույնիսկ հետևում է մամուլի արձագանքներին:
«Այս պահի դրությամբ մարդահամարը նորմալ հունով ընթանում է, ուշացումներ չկան: Ընթացքը վերահսկում ենք, ամեն մի տեղամաս իր հատակագծերով հետևում է ինչքանն են արել, ինչքանն են բերել: Կարծում ենք, կտեղավորվենք մեր ժամկետներում, միջին նորմաներն այնպես է հաշվարկված, որ յուրաքանչյուր հաշվարար կարողանա տեղավորվել 10 օրվա միջակայքում»,- ասաց Կ.Կույումջյանը՝ հավելելով, որ այն մարդկանց, ում դեռ չեն հաշվառել, կայցելեն վաղը:
Կ.Կույումջյանը հավելեց, որ առաջացող խնդիրներն ավելի շատ կախված են նրանից, որ մարդիկ չեն պատկերացնում, թե այս կամ այն հարցը ինչու ենք տալիս, օրինակ՝ տանը լոգասենյակում ցնցուղ կա՞, թե ոչ, զուգարանակոնքը ողողվո՞ղ է, թե ոչ, բայց բացատրական աշխատանքից հետո, որ ամփոփ ցուցանիշներ պետք է ստացվեն, թե ինչքան տնային տնտեսություններ են, որ չունեն ողողվող զուգարան, կամ 21-րդ դարն է, չունեն լոգասենյակ կամ ցնցուղ բնակելի միավորում, ինչքանն են շատ վաղեմության բնակարանում կամ շինությունում ապրում. «Զանգահարում, ասում են՝ հաշվարարն այս մի հարցը այսպես չտվեց, այնպես տվեց, կամ հարևանի տանն ավել հարցրեց, մեզ ոչ: Բնական եմ համարում դա, որովհետև մենք ամբողջ բնակչության հետ գործ ունենք և փորձում ենք բացատրել»:
