ԱՄՆ պետքարտուղարի տեղակալ Ուիլյամ Բըրնսը այսօր Հայաստանում ԱՄՆ դեսպանատանը հանդիպեց հայաստանյան վեց լրատվամիջոցների` «Առաջին լրատվական»-ի, «Ազատություն» ռ/կ-ի, «Առավոտ» օրաթերթի, «Հ1», «Շանթ» և «Երկիր Մեդիա» հ/ը-ների ներկայացուցիչների հետ և պատասխանեց նրանց հարցերին:
«Առաջին լրատավական»-ի հարցը ԱՄՆ պետքարտուղարի տեղակալ Ուիլյամ Բըրնսին վերաբերում էր Հայաստանում ժողովրդավարության վիճակին: Նկատելով, որ 2012 և 2013 թվականներին Հայաստանում հերթական ընտրություններ են սպասվում, իսկ 2008-ի նախագահական ընտրություններից հետո Հայաստանը ճգնաժամ է ապրել, «Առաջին լրատվական»-ը Ուիլյամ Բըրնսին խնդրեց գնահատել Հայաստանի ժողովրդավարական վիճակը և ներկայացնել այս առիթով իր հիմնական ուղերձը Հայաստանի հասարակությանը:
Ու. Բըրնսը պատասխանեց. «ԱՄՆ-ը պաշտպանում է, աջակցում է ժողովրդավարական հաստատությունների կայացմանը Հայաստանում: Դա Միացյալ Նահանգներին լավություն անել չէ, դա այս երկրի ժողովրդի շահերից է բխում: Մենք կարծում ենք, որ չափազանց կարևոր է, որ առաջիկա տարիներին, երբ երկրում արդեն ընտրություններ են սպասվում, ստեղծվի մրցակցային քաղաքական միջավայր: Դրա համար անհրաժեշտ են անկախ լրատվամիջոցներ, որպեսզի մարդիկ կարողանան իրազեկ և անկախ ընտրություն կատարել:
Մենք կարծում ենք նաև, որ պետք է շարունակվի ժողովրդավարական հաստատությունների կայացմանն ուղղված տքնաջան աշխատանքը ոչ միայն անկախ լրատվամիջոցների, այլ նաև`անկախ դատական համակարգի, որովհետև մի բան է, երբ խոսում ենք կոռուպցիայի դեմ պայքարի մասին, սակայն ցանկացած երկրում այդ պայքարը հաջողությամբ պսակելու համար անհրաժեշտ է որպեսզի լինի անկախ դատական համակարգ, անկախ լրատվամիջոցներ, որոնք կապահովեն հաշվետվողականությունը:
Այդ քայլերից և ոչ մեկը դյուրին չէ, նրանցից ոչ մեկը մեկ օրում չի լինի, բայց պետք է անկեղծ լինենք` նշենք այդ հարցերի կարևորությունը և շարունակենք առաջ մղել բարեփոխումները, որովհետև միայն դրա արդյունքում է, որ կձևավորվի այնպիսի հասարակարգ, որին արժանի է Հայաստանի ժողովուրդը»:
