ԱՄՆ պետքարտուղարի տեղակալ Ուիլյամ Բըրնսը այսօր Հայաստանում ԱՄՆ դեսպանատանը հանդիպեց հայաստանյան վեց լրատվամիջոցների` «Առաջին լրատվական»-ի, «Ազատություն» ռ/կ-ի, «Առավոտ» օրաթերթի, «Հ1», «Շանթ» և «Երկիր Մեդիա» հ/ը-ների ներկայացուցիչների հետ:
Իր նախնական խոսքում Ուիլյամ Բըրնսը նախ նշեց, որ ԱՄՆ պետքարտուղարի տեղակալի պաշտոնում սա իր առաջին այցն է Երևան, և ասաց, որ ուրախ է Երևանում գտնվելու համար. «Սա ցույց է տալիս այն մեծ կարևորությունը, որ պետքարտուղարը, նախագահ Օբաման, և Միացյալ Նահանգների ողջ կառավարությունը տալիս է Հայաստանի հետ իր հարաբերություններին և առաջիկա տարիներին այդ հարաբերությունների խորացմանը: Մենք ունենք ընդհանուր նպատակներ` տարածաշրջանում խաղաղության և անվտանգության ամրապնդման ուղղությամբ, մեր երկու երկրների միջև առևտրային հարաբերությունների ամրապնդման հարցով, որպեսզի նոր դարաշրջանում մեր երկու երկրների տնտեսությունները կարողնան ծաղկուն ապրել»:
Ու. Բըրնսը նշեց, որ երեկ հանդիպել և հետաքրքիր քննարկումներ է ունեցել Սերժ Սարգսյանի և ՀՀ ԱԳ նախարար Էդվարդ Նալբանդյանի հետ, իսկ այսօր` հայաստանյան քաղաքացիական հասարակության գործի նվիրյալ առաջնորդների հետ: «Մենք խոսեցինք, թե ինչպես կարող ենք ամրապնդել մեր տնտեսական գործընկերությունը, ամրապնդել անվտանգությունը և կայունությունը և ամրապնդել բաց և համակողմանի քաղաքական գործընթացները»:
Անդրադառնալով իր նշած ոլորտներին՝ ԱՄՆ պետքարտուղարի տեղակալ Ուիլյամ Բըրնսը նշեց. «Տարածաշրջանային անվտանգության հարցերով մենք սերտորեն համագործակցում ենք Հայաստանի հետ: ԱՄՆ-ը բարձր է գնահատում Հայաստանի մասնակցությունը միջազգային անվտանգության ուժերի կազմում`Աֆղանստանում: Մենք բարձր ենք գնահատում այն, որ վերջերս Հայաստանի կողմից այդ առաքելությունում ներգրավված զինծառայողների թիվը ավելացվեց: Մենք նաև ողջունում ենք հայկական խաղաղապահ ուժերի ներկայությունը Կոսովոյում»:
ԱՄՆ պետքարտուղարի տեղակալը վերահաստատեց ԱՄՆ-ի հանձնառությունը` որպես ԵԱՀԿ ՄԽ-ի համանախագահ օգնել կողմերին` հասնելու տևական խաղաղ լուծման ԼՂ հարցում, ապա բարձր գնահատեց Հայաստանի հանձնառությունը Թուրքիայի հետ հարաբերությունները կարգավորելու ուղղությամբ. «Մենք պաշտպանում ենք հայ-թուրքական արձանագրությունները և հույս ունենք, որ այդ արձանագրությունները երկու երկրների կողմից կվավերացվեն»: Ու. Բըրնսը նշեց, որ ԱՄՆ-ը օժանդակում է Հայաստանում տնտեսական և շուկայական բարեփոխումներին. «Մենք ձգտում ենք օգնել Հայաստանի տնտեսական առաջընթացին՝ թե՛ մեր երկխոսության միջոցով` Հայ-ամերիկյան տնտեսական հարցերով համագործակցության միջկառավարական աշխատանքային խմբի շրջանակներում, թե՛ մեր աջակցության ծրագրերի միջոցով»:
Այնուհետև ԱՄՆ պետքարտուղարի տեղակալը նկատեց, որ կոռուպցիան խոչընդոտում է տնտեսական զարգացմանը և թույլ չի տալիս զարգացում ապահովել. «Մենք շարունակում ենք հավատարիմ մնալ Հայաստանի հետ այս ոլորտում աշխատելու, բարեփոխումները առաջ տանելու հարցում: Մասնավորապես՝ մենք քաջալերում ենք Հայաստանին բարելավելու գործարար միջավայրը, որը կհանգեցնի մեր միջև առևտրի և ներդրումների ծավալների մեծացմանը: և, ի վերջո ,քանի որ 2012 թվականը Հայաստանի համար ընտրական տարի է` մենք քննարկեցինք այնպիսի միջավայրի ձևավորումը, որը ազատ, արդար ընտրությունների անցակացման համար նպաստավոր կլինի:
Սա չի վերաբերում միայն այն ամենին, ինչ տեղի է ունենալու քվերակության օրը, այլ վերաբերում է նրան, թե ինչ է տեղի ունենում ժողովրդավարական գործընթացների լայն համատեքստում, այդ թվում՝ խրախուսելը կենսունակ և բազմազան բազմակարծությունը լրատվամիջոցներում, որպեսզի քաղաքացիները ընտրություն կատարելիս կարողանան իրազեկված, ինքնուրույն որոշումներ կայացնել: ԱՄՆ-ի և Հայաստանի միջև հարաբերությունները կարևոր են մեր երկու պետությունների համար, և ընդհանուր տարածաշրջանի համար: Իմ այս պաշտոնում ես կձգտեմ ամեն ինչ անել ոչ միայն մեր երկու երկրների կառավարությունների միջև հարաբերությունները ամրապնդելու, այլ նաև մեր հասարակությունների միջև կապերը ամրապնդելու ուղղությամբ»,- հայտարարարեց ամերիկացի բարձրաստիճան պաշտոնյան:
