Շվեդիայի օդաչուների ասոցիացիայի անդամների կեսից ավելի խոստովանել է, որ թռիչքների ժամանակ չեն կարողանում հաղթահարել քունը, 70%-ը նշել է, որ ուժեղ հոգնածության պատճառով առնվազն մեկ անգամ սխալ են գործել ինքնաթիռի կառավարման ժամանակ: Այս մասին հաորդում է տեղի The Local թերթը` վկայակոչելով անկախ հետազոտության արդյունքները:
Պարբերականը գրում է, որ հարցումն անցկացվել է տարբեր ավիաընկերութւյուններում աշխատող 625 օդաչուների շրջանում: Հարցման մասնակիցների 80%-ը հայտարարել է, որ աշխատանքի գործող պայմանները և մեծ ծանրաբեռնվածությունը «լուրջ վտանգ են ներկայացնում թռիչքների անվտանգությանը»: Այս պահին օդաչուների աշխատանքային օրը տևում է 13-15 ժամ:
«Հարցման արդյունքները գործողությունների դիմելու ազդանշան են. դա մեզ շատ է անհանգստացնում»,- հատարարել է օդաչուների ասոցիացիայի ներկայացուցիչը: Նա հայտնել է, որ, չնայած դրան, իշխանությունները ցանկանում են օդաչուների աշխատանքայի օրը դարձնել մինչև 16 ժամ:
Փորձագետները նշում են, որ օդաչուների խիստ հոգնածության խնդիրը չի սահմանափակվում միայն Շվեդիայով, այն շատ ավելի գլոբալ է: Ավելի վաղ մեկ այլ հարցման ժամանակ բրիտանացի օդաչուները հայտնել էին, որ իրենք տառապում են խրոնիկ հոգնածությամբ: Նրանք խոստովանել էին, որ անգամ քնում են թռիչքի ժամանակ:
