ՆԱՏՕ-ի ԽՎ-ում ՀՀ ԱԺ պատվիրակության անդամ Ստեփան Սաֆարյանն այսօր, ամփոփելով Բուխարեստում կայացած Խորհրդարանական վեհաժողովի աշխատանքները, նշեց, որ վեհաժողովի ընթացքում քաղաքական հանձնաժողովը պատրաստվում էր շրջանառության մեջ դնել ԼՂ հարցի վերաբերյալ մի բանաձևի նախագիծ, որն էականորեն տարբերվում էր նախորդից, որում բավականին շատ սխալ և հակահայկական ձևակերպումներ կային. «Այս բանաձևը հաճելիորեն տարբերվում էր նախորդից, և այդ տեսքով Հայաստանը կարող էր կողմ քվեարկել դրան, եթե, իհարկե, մենք քվեարկության իրավունք ունենայինք»:
Սաֆարյանը նկատեց, որ ադրբեջանական պատվիրակությունը չափազանց դժգոհ էր այդ բանաձևից, քանզի հերթական անգամ մեծ-մեծ խոստումներ էր տվել սեփական ժողովրդին, թե ՆԱՏՕ-ի ԽՎ-ում քննարկվելու է ԼՂ խնդիրը, բայց ձեռնունայն են վերադարձել Ադրբեջան, որովհետև այդ բանաձևն անգամ չի էլ քննարկվել:
Սաֆարյանի խոսքերով՝ այսօր ՆԱՏՕ-ի ԽՎ-ի համազեկուցողները շատ լավ հասկանում են, թե ինչն է ընդունելի Հայաստանի համար, ինչը՝ ոչ, և հենց դրա արդյունքն է Հայաստանի շահերից բխող բանաձևի պատրաստումը:
