ՀՀ գրողների միության նախագահ Լևոն Անանյանը այսօր, անդրադառնալով մտավորականության դերին` երկրի ներքին և արտաքին քաղաքական կյանքում, ասաց, որ Խորհրդային Միության շրջանում մտավորականը մեր ժողովրդի համար հոգևոր առաջնորդ էր, ռահվիրա, ով կազմակերպում էր հասարակական միտքը, և այդ ամենը արտոնված էր, քանի որ մի կողմից՝ հասարակությունը տեր էր կանգնում, մյուս կողմից՝ պետությունը ամեն կերպ օգնում էր մտավորականին:
Լ. Անանյանի խոսքերով` մեր մտավորականությունը ժամանակին բարեկեցիկ էր ապրում, հոնորար էր ստանում, սակայն անկախությունից հետո արժեքային համակարգը փոխվեց, փոխվեց մտավորականի դերն ու առաքելությունը, և այսօր ստեղծվել է մի իրավիճակ, երբ հասարակությունը տարանջատված է, և շատ դժվար է ասել, որ մտավորականների կարծիքը կարող է միավորող և որոշիչ լինել:
Անկախությունից հետո, Լևոն Անանյանի խոսքերով, իշխանությունները ձեռքերը լվացին, մեր ստեղծագործական մտավորականությանն ազատություն տրվեց, և յուրաքանչյուրը շուկայական հարաբերությունների պարագայում սկսեց ինքնուրույն ճանապարհ հարթել:
Նա նշեց նաև, որ մտավորականները բարիկադի երկու կողմերում են հայտնվել, մի կողմում ՀՀԿ-ն է, մյուս կողմում` ՀԱԿ-ը: Նա ավելացրեց, որ մեր արտաքին քաղաքական կյանքում պետք է տեսնել`մտավորականությունը ինչ դեր ունի: Նա ցավով նշեց, որ ստեղծագործական մտավորականության հատվածը նվիրվեց քաղաքականությանը, և դրանից գրականությունը տուժեց, բայց ընտրությունը յուրաքանչյուրինն է. «Ստեղծագործական մտավորականությունը լավ կլինի չքաղաքականանա», -ասաց Լ. Անանյանը` ավելացնելով, որ պալատական մտավորականներ միշտ էլ եղել են:
Գրողների միության նախագահը նաև անդրադարձ կատարեց բանակի խնդիրներին՝ ասելով, որ պետք է փորձենք խորանալ: Այս երեխաները, ջահելները ոչ թե մեր բանակի, այլ հասարակության հետևանքն են:
