ՀՀ ԱԺ հասարակայնության և տեղեկատվության միջոցների հետ կապի վարչությունից «Առաջին լրատվական»-ին տեղեկացնում են, որ Բեռն կատարած աշխատանքային այցի ընթացքում հոկտեմբերի 17-ին ՀՀ ԱԺ նախագահ Հովիկ Աբրահամյանը հանդիպել է Իրանի և Քուվեյթի խորհրդարանների նախագահների հետ:
Առաջին հանդիպումը ԻԻՀ խորհրդարանի նախագահ Ալի Լարիջանիի հետ էր:
Հովիկ Աբրահամյանը նշել է, որ այսօր առանց վարանելու կարելի է փաստել, որ հայ-իրանական հարաբերությունները գտնվում են բարձր մակարդակի վրա և շարունակում են զարգանալ փոխվստահության մթնոլորտում: Նրա համոզմամբ` երկու երկրների ջերմ հարաբերությունների ձևավորմանը մեծապես նպաստում է նաև Հայաստանի և Իրանի օրենսդիր մարմինների համագործակցությունը: Այս համատեքստում կարևորվել է երկու խորհրդարաններում ստեղծված բարեկամության խմբերի գործունեությունը, ինչը նոր լիցք է հաղորդում միջխորհրդարանական կապերին:
Ալի Լարիջանին ուրախությամբ փաստել է, որ Հայաստան կատարած իր պաշտոնական այցից հետո բավականին ակտիվացել է ինչպես միջխորհրդարանական համագործակցությունը, այնպես էլ երկկողմ գործակցությունը տարբեր ուղղություններով, իրականացվում են այցի ընթացքում ձեռք բերված մի շարք տնտեսական ծրագրեր և պայմանավորվածություններ: Կողմերի համոզմամբ` երկու երկրների համագործակցությունը զգալի ներուժ ունի նաև տնտեսական բնագավառում:
Հանդիպման ընթացքում երկու խորհրդարանների նախագահները քննարկեցին նաև տարածաշրջանային զարգացումները, անդրադարձան ԼՂ հակամարտության կարգավորման խնդրին, հայ-թուրքական հարաբերություններին, կարևորեցին տարածարջանային կայունությունը, խաղաղությունը և անվտանգությունը:
Նույն օրը ՀՀ ԱԺ նախագահ Հովիկ Աբրահամյանը հանդիպել է Քուվեյթի Պետության խորհրդարանի նախագահ Ջասեմ Մուհամմադ Ալ-Խարաֆիի հետ:
ԱԺ նախագահը նշեց, որ Հայաստանը կարևորում է արաբական երկրների, այդ թվում նաև Քուվեյթի հետ բազմակողմ հարաբերությունների զարգացումը: ԱԺ նախագահի խոսքով` երկու ժողովուրդները միմյանց շաղկապված են դարերի պատմություն ունեցող բարեկամությամբ, որը հիմք է հանդիսանում միջպետական հարաբերությունների դինամիկ զարգացման համար, ինչի վառ օրինակն է Քուվեյթում գործող ՀՀ դեսպանությունը, որը կարևոր դեր է խաղում երկկողմ հարաբերությունների ընդլայնման և ամրապնդման գործում:
Հովիկ Աբրահամյանը կարևորել է միջխորհրդարանական համագործակցության զարգացումը և ակտիվացումը, համագործակցությունը միջազգային կառույցներում:
Քուվեյթի խորհրդարանի նախագահը նույնպես կարևորել է միջխորհրդարանական կապերի զարգացումը երկու երկրների հարաբերությունները ամրապնդելու գործում: Նա Հովիկ Աբրահամյանին պաշտոնական այցով հրավիրել է Քուվեյթ:
Հանդիպման ընթացքում կողմերն անդրադարձել են նաև այլ հարցերի, կարևորել առևտրատնտեսական կապերի ակտիվացումը, կոնկրետ ծրագրերի իրականացումը` փաստելով, որ առկա է չօգտագործված մեծ ներուժ:
Հոկտեմբերի 18-ին ՀՀ ԱԺ նախագահ Հովիկ Աբրահամյանը Ժնևում Հայաստանի Հանրապետության դեսպանությունում հանդիպել է շվեյցարահայ գործարար, բարերար, «Ֆրանկ Մյուլլեր» ընկերության նախագահ Վարդան Սրմաքեշի հետ:
Խորհրդարանի նախագահը պարոն Սրմաքեշին հանձնել է ՀՀ Նախագահ Սերժ Սարգսյանի կողմից շնորհված պետական պարգևը: Վարդան Սրմաքեշը ՀՀ Նախագահի հրամանագրով ՀՀ անկախության 20-րդ տարեդարձի առթիվ հայապահպանության գործում ներդրած ծանրակշիռ ավանդի, հայրենքին մատուցած ծառայությունների, ինչպես նաև ՀՀ և օտարերկրա պետությունների միջև բարեկամության ամրապնդմանը մեծապես նպաստելու համար պարգևատրվել է «Հայրենիքին մատուցած ծառայությունների համար» 1-ին աստիճանի մեդալով:
Հովիկ Աբրահամյանը շնորհավորել է պարոն Սրմաքեշին պետական բարձր պարգևի արժանանալու կապակցությամբ և կարևորեց նրա հայրենանվեր գործունեությունը ու ներդրումը հայ-շվեյցարական բարեկամական կապերի ամրապնդման գործում: Վարդան Սրմաքեշը շնորհակալություն է հայտնել իր գործունեությունը բարձր գնահատելու համար և նշել, որ այսուհետ ևս ամեն ինչ կանի Հայաստանին օգտակար լինելու համար:
