Եվրոպական կրթական հիմնադրամն (ԵԿՀ) այս տարվանից իրականացնում է «Ուսուցում ողջ կյանքի ընթացքում Արևելյան Եվրոպայում» տարածաշրջանային ծրագիրը, որի նպատակն է տեղեկությունների հավաքումը, փոխադարձ ուսուցման խթանումը և Հայաստանի, Մոլդովայի, Ռուսաստանի, Ուկրաինայի, Բելառուսի, Ադրբեջանի և Վրաստանի ազգային առաջնություններին համապատասխանող ապագա գործողությունների նախագծում:
Ծրագրի համակարգող Միլենա Կորադինին «Առաջին լրատվական»-ին հայտնեց, որ հիմնադրամն օժանդակում է մասնագիտական կրթական ուսուցման զարգացմանն այն երկրներում, որոնք ԵՄ անդամ չեն: «Մեր նպատակն է իրականացնել կրթական ռեֆորմ, որ ուսումնական հաստատությունները տան այնպիսի կադրեր, որոնք համապատախանեն աշխատաշուկայի պահանջներին, նաև աջակցում ենք երիտասարդներին աշխատանք գտնելու հարցում: Հայաստանում շատ անելիքներ կան որակը բարձրացնելու համար: Գործատուները բողոքում են, որ իրենք չեն կարողանում իրենց պահանջած մասնագիտական որակավորմանը համապատասխան մասնագետներ գտնել»,- ասաց Մ. Կորադինին՝ շեշտելով, որ մասնագիտական կրթության որակը Հայաստանում պետք է բարելավվի:
Քառօրյա այցով ՀՀ-ում գտնվող ծրագրի մասնակից երկրների ներկայացուցիչներն այցելել են նաև ձեռնարկություններ:
