«Կանաչաստան» հասարակական կազմակերպությունը «Թարմ օդ» ծրագրի շրջանակներում վաղը` հոկտեմբերի 19-ից սկսած, երկու շաբաթ ստուգայցեր կկատարի Երևանի 12 համայնքների կրթական, առողջապահական և մշակութային հաստատություններում՝ հանրային վայրերում ծխելն արգելող օրենքի կիրառման արդյունավետությունը բարձրացնելու և ծխախոտի ծխից զերծ միջավայրի ապահովման նպատակով:
Ծրագիրը կմեկնարկի Միքայել Նալբանդյանի արձանի մոտից՝ ժ. 12:00-ին: «Առաջին լրատվականի» հետ զրույցում «Կանաչաստանի» հանրային կապերի պատասխանատու Տաթևիկ Ավետիսյանը տեղեկացրեց, որ սա կազմակերպության կազմակերպած`ծխախոտի դեմ պայքարի առաջին ակցիան չէ:
Իր խոսքում նա մասնավորապես կարևորեց հասարակության ինքնագիտակցության բարձրացման հարցը օրենքի կիրառման հարցում: Օրենքի համաձայն`կրթական, առողջապահական և մշակութային հաստատություններում արգելվում է ծխախոտի վաճառքն ու օգտագործումը, իսկ տեսանելի վայրերում պետք է փակցված լինեն ծխելու արգելքի մասին հայտարարություններ: Նա տեղեկացրեց, որ վաղը կազմակերպության կամավորներն ու անդամները, նաև ոստիկանները կշրջեն Կենտրոն համայնքում:
«Եթե հանրային տարածքներում ծխել չի կարելի, բայց ծխում են, իրենք օրենքով սահմանված կարգով պետք է տուգանք վճարեն, բայց վաղն ավելի շատ մեր ուշադրությունը կկենտրոնացնենք օրենքի կիրառումը խրախուսելու վրա»,- ընդգծեց նա:
«Թարմ օդ» ծրագրի իրականացմամբ «Կանաչաստան» ՀԿ-ն նպատակ ունի հասարակության շրջանում հետևողականորեն բարձրացնել հակածխախոտային օրենքի մասին իրազեկությունը և այն կիրառելի դարձնել ոչ միայն այդ օրը, այլև յուրաքանչյուր օր:
Հիշեցնենք, որ ՀՀ կառավարության որոշմամբ հոկտեմբերի 12-ը սահմանվել է Ծխախոտի դեմ պայքարի ազգային օր:
