Այսօր Երևանի թատրոնի և կինոյի պետական ինստիտուտում «Ոսկե ծիրան» կինոփառատոնի նախաձեռնությամբ մեկնարկեց Gaudeamus ուսանողական կինոփառատոնը: Փառատոնի ֆիլմերը կցուցադրվեն Վ. Բրյուսովի անվան լեզվաբանական համալսարանում, Սլավոնական համալսարանում, Երևանի թատրոնի և կինոյի պետական ինստիտուտում և Ամերիկյան համալսարանում: Այս մասին այսօր լրագրողների հետ հանդիպմանը տեղեկացրեց «Ոսկե ծիրան» կինոփառատոնի գլխավոր տնօրեն Հարություն Խաչատրյանը:
«Հաջորդ տարի արդեն ծրագրին կմասնակցեն 10-12 բուհեր: Ծրագիրը և՛ ուսումնական է, և՛ կրթական՝ լեզվամտածողության ու հոգևոր դաստիարակության համար»,- տեղեկացրեց Հ. Խաչատրյանը` հայտնելով, որ կցուցադրվեն «Ոսկե ծիրանում» երբևէ ցուցադրված ֆիլմերը:
Երևանի թատրոնի և կինոյի պետական ինստիտուտի ռեկտոր Արմեն Մազմանյանը, կարևորելով կինոփառատոնը, անգնահատելի համարեց «Ոսկե ծիրանի» այս նախաձեռնությունը: «Մենք կորցրել ենք հանդիսատես, կորցրել ենք չափորոշիչներ, թե ինչ է նշանակում կինեմատորգրաֆ, թե ինչի համար է այն կոչված, ինչ արժեքային համակարգեր են, ինչ ժանրեր են»,- ասաց նա:
«Ոսկե ծիրանի» գլխավոր տնօրեն Հարություն Խաչատրյանն էլ իր հերթին նշեց, որ սա հնարավորություն կտա պատրաստել մասնագետների, որոնց կարիքն այժմ զգացվում է: Նա խոստացավ Երևան հրավիրել լավագույն սցենարիստներին ու ռեժիսորներին, որոնք իրենց փորձը կփոխանակեն երիտասարդներին:
Նրա խոսքով` փառատոնի նպատակն է միջազգային կինոարվեստի ամենանշանավոր նմուշները հնարավորինս հասանելի դարձնել հայ հանդիսատեսին և, մասնավորապես, երիտասասարդությանը:
Ծրագրի ստեղծման հիմք է հանդիսացել այն փաստը, որ «Ոսկե ծիրան» կինոփառատոնն ամեն տարի անց է կացվում հուլիսին՝ համընկնելով ուսանողների ամառային արձակուրդների հետ, որի պատճառով շատերը զրկվում են «Ոսկե ծիրան» փառատոնում ներկայացված ֆիլմերը դիտելու հնարավորությունից:
Ամբողջ տարվա ընթացքում հայաստանյան մի շարք բուհերի ուսանողներ հնարավորություն կունենան անվճար դիտել շաբաթը մեկ ֆիլմ «Ոսկե ծիրանի» ֆիլմերից:
Այսօր փառատոնը կբացվի Անդրեյ Զվյագինցևի ֆիլմով:
Փառատոնին աջակցում է «ՎիվաՍել-ՄՏՍ-»-ը:
