Ռուսական Regnum լրատվական գործակալությունը, վկայակոչելով The Armenian Weekly-ին, հայտնում է, որ հոկտեմբերի 27-28-ը Clark համալսարանում (Մասչուսեթս, ԱՄՆ) տեղի է ունենալու «Հայոց ցեղասպանություն. համեմատական դիտարկմամբ (ունեցվածքի) վերականգնման ու փոխհատուցման հարցեր» խորագրով կոնֆերանսը։
Կոնֆերանսի կազմակերպիչը Կլարկի համալսարանի՝ Հայոց ցեղասպանության հետազոտությունների կենտրոնի ղեկավար, թուրք պրոֆեսոր Թաներ Աքչամն է։ Իր ելույթով կոնֆերանսը բացելու է սոցիոլոգ, Նյու Յորքի համալսարանի պրոֆեսոր Ջոն Տորպին, որի թեզսիներում նշված է. «Փոխհատուցումը կարող է խորհրդանշական լինել, օրինակ՝ ներողություն խնդրելու կամ հուշարձանների ու թանգարանների կառուցման տեսքով։
Դա կարող է կրել նաև տնտեսական տեսք. Օրինակ՝ առանձին մարդկանց կամ խմբերին ֆինանսական փոխհատուցում տալը, կամ էլ նյութական փոխհատուցումը, օրինակ՝ բնիկ ժողովուրդների տարածքային հավակնությունների կարգավորումը»։
Կոնֆերանսում հանրահայտ գիտնականները կներկայացնեն Հայոց ցեղասպանության օրինակով հետհակամարտային արդարադատության իրենց տեսակետերը։ Վերականգնման ու փոխհատուցման թեման վերլուծության է ենթարկվելու Հայոց ցեղասպանության հետևանքները Հոլոքոսթի, ինչպես նաև ամերիկյան հնդկացիների ցեղասպանության հետևանքների հետ համեմատության միջոցով։
Հիշեցնենք, որ այս տարվա հունիսին Գլենդելում տեղի ունեցած կոնֆերանսի ժամանակ Աքչամը հայտարարել էր, որ թուրքական իշխանությունները խոշոր գումարներով գնում են իրենց ակադեմիկոսներին Հայոց ցեղասպանության հերքման մասին հրապարակումներ կատարելու համար։
Ավելի վաղ Թաներ Աքչամը հայտարարել էր. «Հայոց ցեղասպանությունն իսկական Ցեղասպանություն է, այլ ոչ թե ջարդ, սպանություն կամ այլ բան: Ես կասեի՝ եթե 1915-ին տեղի ունեցածը Ցեղասպանություն չանվանենք, այդ դեպքում պետք է ասել, որ աշխարհում որևէ ցեղասպանություն չի եղել: Սա է իմ տրամաբանությունը՝ իրերը պետք է կոչվեն իրենց անուններով, որպեսզի կարողանանք ճիշտ վերաբերվել դրանց»։
