ԱՄՆ դաշնային վերաքննիչ դատարանը որոշում է կայացրել տուգանել մի խումբ իրավաբանների, որոնք նախապես անհիմն հայց են ներկայացրել երկրի նախկին փոխնախագահ Ռիչարդ Չեյնիի, պաշտպանության նախկին նախարար Դոնալդ Ռամսֆելդի և ԱՄՆ զինված ուժերի գլխավոր շտաբերի կոմիտեի նախկին ղեկավար Ռիչարդ Մայերդսի նկատմամբ:
Ըստ հայցի` իրավաբանները փորձում էին ապացուցել, որ 2001 թ. սեպտեմբերի 11-ի ահաբեկչությունների հետևում կանգնած է եղել այն ժամանակ Սպիտակ տանը իշխանության գլուխ գտնվող հանրապետական կուսակցությունը: Այս մասին հաղորդում է ITAR-TASS գործակալությունը:
2001 թ. Պենտագոնում աշխատող մի կին, որը տուժել էր ահաբեկչության հետևանքով, պնդում էր, որ Պենտագոնի շենքը փլուզվել է ոչ թե նրա մեջ ինքնաթիռի մխրճվելու պատճառով, այլ որովհետև երկրի իշխանությունները ռումբ էին տեղադրել շենքի տակ: Այն պայթեցնելու և երկրում լարված մթնոլորտ ստեղծելու միջոցով, իբր, իշխանությունները փորձելու էին լռեցնել կոշտ քաղաքականություն վարող ադմինիստրացիայի գործողությունները քննադատողներին:
Դատարանը որոշել է պատժել ոչ թե այդ կնոջը, այլ նրա փաստաբաններին, քանի որ կինն ամբողջությամբ հենվել է իրավաբանների հավաստիացումների և փաստարկների վրա: Իրավաբանները ստիպված են լինելու վճարել 15 հազար դոլար տուգանք և փակել դատական ծախսերը:
