«Այնպիսի մթնոլորտ պետք է ստեղծել,որ իշխանությունը մատչելի լինի հասարակությանը, մարդիկ հնարավորություն ունենան դիմելու իրենց ընտրած կուսակցություններին»,- այսօր հրավիրված ասուլիսի ժամանակ նման տեսակետ հայտնեց սոցիլոգ Ահարոն Ադիբեկյանը: Նա ողջունեց քաղաքապետարանների և մարզպետարանների, ինչպես նաև քաղաքական գործիչների սեփական կայքեր և բլոգեր ունենալու փաստը: «Եթե չկա հետադարձ կապ, չկա ժողովրդավարական կառավարում»,- համոզմունք հայտնեց նա:
Ասուլիսին ներկա բանախոսը՝ տեղեկատվական անվտանգության հարցերով փորձագետ Սամվել Մարտիրոսյանը, իր հերթին ավելացրեց, որ քաղաքական գործիչների շրջանում հիմա խիստ մոդայիկ է դարձել Facbook-ում սեփական էջ կամ բլոգ բացելը, սակայն «դրա տակից դուրս գալն է դժվար», «սոցիալական կայքերում անկառավարելի շփումներ են, և քաղաքական գործիչներն այդ առումով վարկանիշի անկման վտանգի են ենթարկվում: Ադրբեջանական հետախուզությունը, օրինակ, կարող է գեղեցիկ աղջկա պրոֆիլով փորձել ընկերանալ այս կամ այն քաղաքական գործչի հետ: Facbook-ում նման փորձեր արվում են ադրբեջանական և թուրքական կեղծ պրոֆիլներով»:
Մարտիրոսյանը խորհուրդ տվեց, որ սոցիալական ցանցերում օգտատերերն ամեն ինչ գրեն վերապահումներով, որովհետև ցանկացած պահի երկուսի միջև եղած խոսակցությունները կարող են հանրայնացվել «գաղտնիությունը ցանցում միայն թվացյալ է:
Համաձայնելով նրա հետ՝ Ադիբեկյանը նշեց, որ իրենց կենտրոնը ևս զգուշանում է ամեն տեսակի վտանգից, ուղարկված ամեն տեսակի սպամներից, քանի որ դրանց պատճառով երկու անգամ կորցրել են իրենց արխիվը: Պատասխանելով լրագրողներից մեկի հարցին, թե կա՞ վիճակագրություն, հայ քաղաքական գործիչների քանի՞ տոկոսն է օգտվում սոցիալական ցանցերից՝ սոցիոլոգը նկատեց, որ նման հարցում իրենք երբևէ չեն անցկացրել:
Ամփոփելով՝ Մարտիրոսյանը հիշեցրեց, որ ԼՂՀ կառավարության անդամներին կես տարի առաջ արգելվել է գոնե աշխատանքի վայրից սոցիալական ցանցեր մուտք գործել, «չինովնիկները, սակայն, այդ բանը կարող են անել իրենց տանից՝ մեկ այլ պրոֆիլով»:
