«Եթե «Ժողովրդական կուսակցության» առաջնորդ Տիգրան Կարապետյանի` Հայ ազգային կոնգրեսին միանալու մղումն ազնիվ է, ողջունում եմ նրա այդ քայլը»,- «Առաջին լրատվականի» հետ զրույցում ասաց Հայ ազգային կոնգրեսի ներկայացուցիչ Գուրգեն Եղիազարյանը` անդրադառնալով Տիգրան Կարապետյանի հայտարարությանը, որ հնարավոր է` ինքը միանա հոկտեմբերի 28-ին կայանալիք ՀԱԿ հանրահավաքին:
Նրա խոսքով, ՀԱԿ-ը բաց կառույց է, նրա դռները բաց են բոլոր այն քաղաքական ուժերի և անհատների առջև, ովքեր միանալու ցանկություն կունենան:
Պատասխանելով հարցին` ինչո՞ւ, իր կարծիքով, Կարապետյանը որոշեց ՀԱԿ-ի հանրահավաքներին միանալու մտադրության մասին հայտարարել հենց այս պահին` Եղիազարյանն ասաց. «Դժվարանում եմ ասել` ինչու հենց հիմա, սակայն կարծում եմ, որ բացի «Ժողովրդական կուսակցությունից» այլ ուժեր ևս նման մտադրություն կհայտնեն»:
Անդրադառնալով երկխոսության արդյունքում ՀԱԿ-ի վարկանիշի նվազեցման մասին դիտարկմանը` Գուրգեն Եղիազարյանը կտրականապես չհամաձայնեց դրա հետ:
Նշենք, որ այսօր կայացած ասուլիսի ընթացքում ՀՀՇ վարչության նախագահ Արամ Մանուկյանը խոստովանել էր, որ իշխանությունների հետ երկխոսության արդյունքում ՀԱԿ-ը բավական թվով համախոհներ է կորցրել:
