ԱԺ ՀՀԿ խմբակցության պատգամավոր Գագիկ Մելիքյանը, գնահատելով Աստանայի գագաթնաժողովը, կարծիք հայտնեց, թե Աստանայում Հայաստանը ստացավ այն, ինչ սպասում էր: Նա բացառիկ գնահատեց Սերժ Սարգսյանի ելույթը, քանզի, ըստ նրա, այդ ելույթով Սերժ Սարգսյանը ի լուր աշխարհի հայտարարեց, թե ինչ է սպասվում, եթե բանակցային գործընթացը տապալվի: «Ելույթի այն մասը, թե մենք կճանաչենք ԼՂՀ անկախությունը, եթե Ադրբեջանը պատերազմ սկսի, չափազանց կարևոր է: Պատերազմը մեր ցանկությունը կամ ընտրությունը չէ, իսկ Սերժ Սարգսյանի ելույթն էլ սպառնալիք չէ: Սրանով նա պարզապես լսեցրեց բոլորին մեր քայլերի մասին»: Գագիկ Մելիքյանի գնահատմամբ, Աստանայի գագաթնաժողովը Հայաստանի դիվանագիտության հաղթանակներից ևս մեկն էր, քանզի այստեղ ամրագրվեցին Հելսինկյան եզրափակիչ ակտում նշված սկզբունքները, և Ադրբեջանի համար պարզ դարձավ, որ Հայաստանը և ԵԱՀԿ Մինսկի խումբը բանակցային սկզբունքներում միակարծիք են: