«Արտահերթ ընտրությունների պահանջը տեղավորվում էր երկխոսության գործընթացի մեջ, իսկ Սերժ Սարգսյանի անհապաղ հրաժարականի ժամանակ կոշտ, միակողմանի պահանջ ես ներկայացնում»,- այսօր կայացած մամուլի ասուլիսի ժամանակ հայտարարեց ՀՀՇ վարչության նախագահ Արամ Մանուկյանը` անդրադառնալով արտահերթ նախագահական ընտրությունների և Սերժ Սարգսյանի հրաժարականի միջև տարբերությանը:
«Մենք այլևս չենք ուզում բանակցել մայրաքաղաք բերող ճանապարհները փակող, սեփական ժողովրդին տոտալ պատերազմ հայտարարած իշխանությունների հետ: Նման իշխանությունների հետ երկխոսելու հեռանկար չենք տեսնում: Միաժամանակ` մենք ինքնանպատակ չէինք գնացել իշխանությունների հետ երկխոսության: Պարզապես նույն այդ իշխանությունը խոհեմություն չունեցավ և չարաշահեց մեր լրջմիտությունը: Իրենց թվում է մեզ «ֆռռացրին», բայց մենք չենք փոշմանել երկխոսության գնալու համար, որքան էլ դրա ընթացքում համախոհներ կորցրեցինք»,- նկատեց Արամ Մանուկյանը:
Նրա խոսքով` ներկայիս իշխանությունները երկիրը կառավարել անկարող են: «Հյաաստանի համար ողբերգություն է մի քանի օրում ոչ մարտական պայմաններում երեք զինվոր կորցնել: Սա ողբերգություն է, ով էլ իշխանություն լինի: Իշխանությունը, սակայն, ոչ մի բան չի անում, և քան հեռանալն է, այլ ճանապարհ չունի: Բանակում կատարվող այլանդակությունները վերջին ժամանակներս նույնիսկ դոմինանտ դեր են գրավել, քան անգամ երկրում առկա արտագաղթը: Բանակի քանդվելն ու արտագաղթը քանդելու են Հայաստանը»,- ասաց ՀՀՇ վարչության նախագահը: