Կովկասի ինստիտուտը Հայաստանում ԱՄՆ դեսպանատան հետ համատեղ այսօր ներկայացրեց Ալֆրեդ Ստեփանի խմբագրած «Վտանգված ժողովրդավարություններ» և Խուան Լինցի ու Ալֆրեդ Ստեփանի «Ժողովրդավարությանն անցնելու և ժողովրդավարության կայացման խնդիրները. Հարավային Եվրոպա, Հարավային Ամերիկա և Հետկոմունիստական Եվրոպա» գրքերը, որոնք թարգմանվել են հայերեն:
ՀՀ կրթության և գիտության նախարար Արմեն Աշոտյանը իր ելույթում, կարևորելով այս գրքերի ստեղծումը, նշեց, որ մեզ մոտ քաղաքագիտական դպրոցի խնդիրները 20 տարիների ընթացքում վերջնականապես լուծված չեն, պատճառները ոչ միայն դասախոսական կազմի վերապատրաստման հետ կապված խնդիրներ են, այլ նաև այն պատճառով, որ հայալեզու գրականություն չկա, և այս երկու գրքերը կարող են ուսումնական ձեռնարկ լինել այն մարդկանց համար, ովքեր ուզում են ժամանակակից քաղաքագիտական մտքին ծանոթ լինել:
Անդրադառնալով ժողովրդավարությանը և նրան սպառնացող վտանգներին` ԿԳ նախարարը նշեց, որ այսօր ժողովրդավարությունը վտանգի տակ է ոչ միայն անցումային երկրներում, այլ նաև այն երկրներում, որտեղ ժողովրդավարությունն ունի հարյուրամյա պատմություն: Նա նաև մեջբերեց 20 տարի առաջ Ֆուկույամայի հայտարարած այն միտքը, որ այլևս արևմտյան լիբերալ ժողովրդավարությունը հաղթել է բոլորին, սակայն քսան տարի անց, Ա. Աշոտյանի խոսքերով, տեսնում ենք, որ այդպես չէ, ժողովրդավարության հետ կապված խնդիրներ են ծագել ամբողջ աշխարհում:
Արմեն Աշոտյանը նաև անդրադարձավ անցումային երկրներում ժողովրդավարության կայացմանը` փաստելով, որ նման երկրներում կա հիասթափություն ժողովրդավարությունից: Նրա խոսքերով` մեր ժողովրդավարությունը համընկավ սոցիալական ծանր խնդիրների հետ, և պետք է լավատեսություն լինի:
Արմեն Աշոտյանը նշեց, որ քաղաքացիական հասարակության կայացման տեսանկյունից` վերջին տարիներին Հայաստանում փոփոխություններ, այնուամենայնիվ, կան, կա մտածելակերպի, մթնոլորտի փոփոխություն դեպի քաղաքացիական հասարակություն, կա մարդկանց գիտակցության և արժանապատվության գիտակցում: Այս փոփոխությունները, նրա խոսքերով, ոչ միայն վիրտուալ դաշտում են, այն նաև իրական. «Մեզ մոտ իրավիճակ է փոխվում. Նախընտրական ցիկլի նախաշեմին մենք պարտավոր ենք հերթական անգամ չկոտրել ժողովրդավարության ինքնաալիքը»:
Հայաստանում ԱՄՆ դեսպանատան գործերի ժամանակավոր հավատարմատար Բրյուս Դոնահյուն իր ելույթում նշեց, որ Միացյալ Նահանգների կառավարությունը աշխատում է ՀՀ կառավարության հետ Հայաստանում ժողովրդավարության հաստատման համար: Նա հույս հայտնեց, որ այս գիրքը կարող է քաղաքագետների համար լավ ձեռնարկ լինել: Ի վերջո, նրա խոսքերով, ժողովրդավարությունը գործընթաց է, ապրելու միջոց, փոխզիջում, հանդուժողովականություն բոլոր քաղաքացիների միջև, ժողովրդավարությունն ազատություն է, «ժողովրդավարություն» նշանակում է պատասխանատվություն և ոչ թե ազատություն պատասխանատվությունից:
Կալիֆոռնիա-Բերկլի համալսարանի պրոֆեսոր դոկտոր Ստիվեն Ֆիշը նշեց, որ ինքը, լինելով դասախոս, այս գիրքը տալիս է կարդալու իր ուսանողներին, և սա Հայաստանում ուսանողներին և գիտնականներին հնարավորություն կտա` վերլուծելու քաղաքական ռեժիմի փոփոխությունները: Նրա խոսքերով`սա անգլերեն լեզվով լավագույն գրքրերից է, սա նաև գիրքն է, որ ժամանակակից և միաժամանակ դասական գիրք է:
Կովկասի ինստիտուտի տնօրեն Ալեքսանդր Իսկանդարյանն էլ նշեց, որ ժողովրդավարությունն ակտ չէ, պրոցես է, և Հայաստանը այդ պրոցեսի մեջ է: