Ֆրանսիայում հունիսի վերջին գրանցված սաստիկ շոգը հերթական անգամ ուշադրություն է հրավիրել Փարիզի գլխավոր խորհրդանիշներից մեկի՝ Էյֆելյան աշտարակի առանձնահատկության վրա։ Բարձր ջերմաստիճանի ազդեցությամբ մետաղական կառույցը կարող է ժամանակավորապես մեծացնել իր չափերը և նույնիսկ փոքր-ինչ փոխել ձևը, հայտնում է RTL ռադիոկայանը։
1889 թվականի Համաշխարհային ցուցահանդեսի համար կառուցված Էյֆելյան աշտարակը բացման պահին ունեցել է 300 մետր բարձրություն։ 2022 թվականի մարտի 15-ին դրա գագաթին տեղադրված 6 մետրանոց ռադիոանտենայի շնորհիվ աշտարակի բարձրությունն այժմ կազմում է 330 մետր։ Սակայն տարվա ընթացքում այն կարող է փոփոխվել ևս մի քանի սանտիմետրով՝ կախված օդի ջերմաստիճանից։
Ինժեներ, ճարտարապետ և պատմաբան Բերտրան Լըմուանի խոսքով՝ աշտարակի կառուցման ժամանակ օգտագործված կռած երկաթը ջերմության ազդեցությամբ ընդարձակվում է, իսկ ջերմաստիճանի նվազման դեպքում՝ կրկին սեղմվում։ Նրա հաշվարկներով՝ եթե օդի ջերմաստիճանը տատանվում է -10-ից մինչև +40 աստիճան Ցելսիուսի սահմաններում, աշտարակի բարձրությունը կարող է ավելանալ մոտ 10 սանտիմետրով, այսինքն՝ յուրաքանչյուր 10 աստիճան տաքացման դեպքում՝ շուրջ 2 սանտիմետրով։
Մասնագետի խոսքով՝ այդ փոփոխություններն անզեն աչքով գրեթե նկատելի չեն։
Արևի շարժումը նույնպես ազդում է աշտարակի վրա։ Օրվա ընթացքում արևի ճառագայթներն աստիճանաբար տաքացնում են նախ արևելյան, ապա հարավային և արևմտյան հատվածները, մինչդեռ հյուսիսային կողմը մնում է համեմատաբար ավելի սառը։ Արդյունքում տաքացած հատվածներն ավելի շատ են ընդարձակվում, ինչի հետևանքով աշտարակի գագաթը փոքր-ինչ շեղվում է։
Մասնագետը նաև ընդգծել է, որ նույնիսկ ծայրահեղ շոգը չի սպառնում աշտարակի անվտանգությանը, քանի որ երկաթը հալչում է մոտ 1500 աստիճան Ցելսիուսի պայմաններում։ Հետևաբար, բարձր ջերմաստիճանների պատճառով ո՛չ կառույցի ամրության, ո՛չ էլ վթարի վտանգ չկա։
