«Պաշտոնական Ստեփանակերտը դեմ չէ խաղաղապահների տեղակայմանը տարածաշրջանում»,- «Առաջին լրատվականի» հետ զրույցում անդրադառնալով Ադրբեջանի արտգործնախարար Էլմար Մամեդյարովի հայտարարությանը խաղաղապահների տեղակայման վերաբերյալ՝ կարծիք հայտնեց ԼՂՀ նախագահի մամլո խոսնակ Դավիթ Բաբայանը:
Նա նշեց, որ Մամեդյարովի այդ հայտարարությունը վաղաժամ է և կարելի է սև PR անվանել, որովհետև խաղաղապահների խնդիրը շատ ավելի բարդ հարց է: Բաբայանի խոսքերով՝ խաղաղապահների տեղակայման համար մի քանի նախապայման է պետք. «Նախևառաջ, հակամարտությունը պետք է համապարփակ ձևով կարգավորվի, կողմերը մեկը մյուսի հետ նստեն բանակցային սեղանի շուրջ, ճանաչեն մեկը մյուսին և ճշտեն սահմանները վերջնականապես: Միայն այս ամենից հետո կարելի է խոսել խաղաղապահների տեղակայման մասին»:
Ըստ Բաբայանի՝ վերոնշյալ նախապայմանների իրականացման դեպքում խաղաղապահների տեղակայումն ավելի շատ սիմվոլիկ բնույթ կկրի, որովհետև եթե կողմերը կարողանում են պահպանել խաղաղությունն արդեն 17 տարի՝ առանց կողմնակի միջնորդության, և եթե կարողանան ճշտել սահմաններն ու ճանաչել մեկը մյուսի անկախությունը, ապա խաղաղապահների կարիք ընդհանրապես չի զգացվի. «Սա, իհարկե, ապագայի խնդիր է, և քանի դեռ հակամարտության կարգավորման ուղղությամբ քայլեր չեն ձեռնարկվում Ադրբեջանի կողմից, խաղաղապահների տեղակայման մասին խոսակցությունները գիտական ֆանտաստիկայի ոլորտին են պատկանում և դրա վրա կենտրոնանալու հարկ չկա»: