Հայաստանի ոստիկանության անձնագրերի և վիզաների վարչության պետ Նորայր Մուրադխանյան «Առաջին լրատվական»-ի հետ զրույցում հերքեց շրջանառվող լուրերն այն մասին, որ ՀՀ քաղաքացիներին նոր անձնագրերի տրամադրման գործընթացը կասեցված է:
«Նման բան չկա: Յուրաքանչյուր քաղաքացի ցանկացած պահի կարող է դիմել անձնագրային և վիզաների վարչության իր տարածքային ծառայությանը և նոր անձնագիր ստանալ»,- հավաստիացրեց նա:
Հիշեցնենք, որ «Խոսքի իրավունք» միավորումը ուրբաթ օրը տարածած հայտարարության մեջ նշել էր, որ ՀՀ քաղաքացիներին նոր անձնագրեր չեն տրամադրվում: Միավորման հաղորդմամբ՝ այդ գործընթացը այս պահին Հայաստանում կասեցված է:
Հիշեցնենք նաև, որ Հայաստանի կառավարության 1998 թվականի դեկտեմբերի 25-ի «ՀՀ-ում անձնագրային համակարգի կանոնադրությունը և ՀՀ քաղաքացու անձնագրի նկարագիրը հաստատելու մասին» թիվ 821 որոշման համաձայն` ոստիկանությունը ծառայությունների վճարովի մատուցման պայմանագրի հիման վրա անձնագիր կարող է տալ կամ փոխանակել ավելի կարճ ժամկետներում:
Կառավարության 11.12.2008 թվականի թիվ 1465-Ն որոշման համաձայն՝ ՀՀ քաղաքացիները իրենց ցանկությամբ, բացի սահմանված պետական տուրքից (1000 դրամ), հավելյալ վճարումներ կատարելու դեպքում անձնագիր կարող են ստանալ կամ փոխանակել ավելի կարճ ժամկետներում: