«Հայելի» ակումբի այսօրվա հյուրերն էին ՀՀԿ-ական պատգամավոր Ռաֆիկ Պետրոսյանն ու ՀԺԿ-ից Ֆելիքս Խաչատրյանը:
Ֆելիքս Խաչատրյանը նշեց, որ իշխանությունը, ի վերջո, պետք է հասկանա իրավիճակը և վճռական քայլ անի. «Ինչու՞ էինք մենք ուզում արտահերթ ընտրություննե՞ր: Միայն մեկ խախտում բավարար է, որ ընտրությունները չհամարել արդար, օրինակ Սերժ Սարգսյանը, լինելով թեկնածու, շարունակել է վարչապետի պաշտոնում մնալ, սա կոպտագյույն խախտում էր: Մենք ցանկացանք անցնցում հասնել իշխանափոխության, մենք ցույց տվեցինք մեր ուժը` շուրջօրյա ակցիաներին, կարգապահ ակցիաներ իրականցրեցինք: Եթե իշխանությունները չարձագանքեն` արդեն ժողովուրդը ճնշում կկիրառի: Պայքարի բոլոր խաղաղ ձևերը շարունակելու ենք կիրառել»:
Ռաֆիկ Պետրոսյան էլ ասաց. «ՀԱԿ-ը մի օր հրաժարվում է երկխոսությունից, մի օր առաջարկում է երկխոսություն… Դրա վերջը հանգելու է նրան, որ ի վերջո երկխոսությունը պետք է կայանա: Երկխոսությունը կարող է շարունակվել, բայց արդյունք չի կարող տալ, որովհետև առաջիկայում ընտրություններ են: Դուք ձեր օրկարգը շատ եք փոխում` ունեցեք մի նպատակ, մի կարգախոս: Դուք ճշտեք, թե ինչ եք ուզում»: Ռաֆիկ Պետրոսյանի դիտարկումներին արձագանքեց Ֆ. Խաչատրյանը` ասելով. «Մեր օրակարգը փոխվեց` իրավիճակից ելնելով»:
«Մի օր խորհրդարանական եք ուզում, մի օր` նախագահական, մի հատ ճշտեք` ինչ եք ուզում»,- անընդհատ ասում էր Ռ. Պետրոսյանը Ֆ. Խաչատրյանին: «Մենք ընտրել ենք խաղաղ ճանապարհը, մեզ որ զենք էլ տան` մենք չենք գնա»,- ասաց ՀԺԿ-ական գործիչը:
Ռ.Պետրոսյանն առաջընթաց համարեց, որ ոստիկանության հետ ընդհարումներ չեն եղել, նշեց, որ ոստիկանությունը միջոցառումները «խաղաղ» է որակել, դրա համար էլ գործողություններ չեղան:
Պատասխանելով այն հարցին, որ եթե արտահերթ ընտրություններն այժմեական չի համարում, ինչպե՞ս է պատկերացնում Ս. Սարգսյանի հրաժարականը, Խաչատրյանն ասաց. «Մենք մեր հույսը կապում ենք ժողովրդի հետ»:
