Կանանցից երկուսը հայտարարել են շոուի շրջանակներում իրենց էկրանային ամուսինների կողմից բռնաբարությունների, իսկ երրորդը՝ առանց համաձայնության ենթադրյալ սեռական գործողության մասին, գրում է BBC-ն։
Ըստ տուժողների՝ իրենք բազմիցս դիմել են շոուի հոգեբանական աջակցության ծառայությանը և հայտնել բռնության ու սպառնալիքների մասին, սակայն ստեղծողները պատշաճ միջոցներ չեն ձեռնարկել, իսկ կանանց մասնակցությամբ դրվագները շարունակել են ցուցադրվել եթերում։ BBC-ի հնչեղ հետաքննությունից հետո Channel 4-ը ջնջել է շոուի բոլոր սերիաներն իր սթրիմինգային հարթակներից և փակել նախագծի սոցիալական էջերը։ Հեռուստաալիքի ղեկավար Պրիա Դոգրան հրապարակավ ներողություն է խնդրել կանանցից և հայտարարել, որ նախաձեռնվել է երկու անկախ հետաքննություն՝ պարզելու մասնակիցների անվտանգության ապահովման կանոնակարգերի հնարավոր խախտումները։
Միևնույն ժամանակ CPL արտադրող ընկերությունը հերքում է անվտանգության կանոնների խախտումը՝ պնդելով, որ իրենք յուրաքանչյուր դեպքում գործել են սահմանված արձանագրությունների համաձայն, իսկ կանայք նկարահանումների ժամանակ հավաստիացրել են, որ սեռական կապերը եղել են կամավոր։ Մեղադրվող տղամարդիկ ևս հերքում են բռնաբարության և ոտնձգությունների մեղադրանքները։
Լոնդոնի ոստիկանությունը հայտարարել է, որ առայժմ պաշտոնական հաղորդում չի ստացել, սակայն կոչ է արել ռեալիթի շոուի հնարավոր տուժողներին անհապաղ դիմել իրավապահ մարմիններին։ Ոլորտի փորձագետներն ու իրավաբանները խստորեն քննադատել են նախագծի ձևաչափը՝ նշելով, որ անծանոթ մարդկանց մեկուսացված և արհեստական պայմաններում մտերմության դրդելը հանգեցնում է չվերահսկվող և խիստ վտանգավոր ռիսկերի։
