Ռուսաստանի վարչապետ Վլադիմիր Պուտինի` նախագահական ընտրություններին մասնակցելու ոչ ոքին չզարմացրած հայտարարությանը հետևել է մեկ այլ` ավելի զարմանալի առաջարկություն` ստեղծել Եվրասիական միություն: Պուտինը խոստովանել է, որ ցանկանում է որպեսզի Ռուսաստանը դարձյալ գլխավորի հետխորհրդային հանրապետությունների միջազգային բլոկը:
“World Politics Review ամսագրում տպագրված հոդդվածում Ռիչարդ Վայցը Պուտինի ճանապարհին լուրջ խոչընդոտեր է տեսնում: Նրա կարծիքով՝ քիչ հավանական է, որ նախկին Խորհրդային միության տարածքում կառաջանա նոր` Եվրասիական միություն:
Պուտինի մամուլի քարտուղարը Коммерсантъ թերթին տված հարցազրույցում հայտնել է, որ Եվրասիակամն միությունը կլինի Պուտինի առաջնային խնդիրներից մեկը:
Թեև հայտնի է, որ Պուտինը Խորհրդային միության ջերմ պաշտպան է, այնուամենայնիվ, մի քանի օր առաջ «Известия» թերթում տպագրված իր հոդվածում նա գրել է, որ նպատակ չունի վերականգնել ԽՍՀՄ-ը, քանի որ «շատ միամիտ կլինի վերականգնել կամ կրկնօրինակել այն, ինչն արդեն անցյալում է»: Նա նշել է, որ իր առջև նպատակ է դրել նոր կառույցը դարձնել ժամանակակից աշխարհի բևեռներից մեկը, որը կարող է մրցակցել «մյուս առանցքային խաղացողների»` Եվրամիության, Միացյալ Նահանգների և Չինաստանի հետ:
Այնուամենայնիվ, հոդվածագիրը թերահավատորեն է վերաբերվում Պուտինի այդ նկրտումներին: Պետք է սկսել նրանից, որ Ռուսաստանից 10 տարի է պահանջվել Մաքսային միություն ստեղծելու համար, որտեղ սահմանափակ թվով մասնակիցներ կան: Դժվար է պատկերացնել, թե ինչպես է Պուտինը պատրաստվում միավորել ավելի մեծ թվով երկրների և այդ միությունը համապատասխանեցնել ԵՄ ոգուն:
Եթե Պուտինն անգամ պատկերացնում է, թե ինչպես պետք է ստեղծվվի այդ միությունը, ապա դրա գոյության համար անհրաժեշտ կլինի մտցնել միասնական արժութային համակարգ, կառավարման անկախ բյուրոկրատական ապարատ, օրենսդրություն և տնտեսական կանոններ: ԵՄ երկրներից տասնամյակներ են պահանջվել դրան հասնելու համար: Բացի այդ, ԵՄ երկրների՝ միմյանցից տարբեր տնտեսական աճը և տնտեսական տարբեր ցուցիչները երևան են հանել իրենց կործանիչ հետևանքները, ինչը ծանր կացության մեջ է դրել ԵՄ-ին:
Հոդվածագիրը կարծում է, որ Պուտինի Եվրասիական միությունը չի կարողանա դիմակայել արդեն կայացած Շանհայի Համագործակցության կազմակերպության և Եվրամիության մրցակցությանը:
Ի վերջո, հաշվի առնելով խորհրդային փորձը, հետխորհրդային պետությունները չեն ցանկանա դարձյալ հայտնվել Մոսկվայի ղեկավարման տակ: Չնայած Ղազախստանն արդեն հավանություն է տվել Պուտինի ծրագրին, Ուկրաինան և Վրաստանը կտրականապես դեմ են հանդես եկել դրան, Հայաստանից և Ադրբեջանից նույնպես հույսեր չկան:
