Այսօր ԱրմԹեք 2011 համաժողովի ժամանակ ՀՀ էկոնոմիկայի նախարար Տիգրան Դավթյանը ողջունեց Համաշխարհային բանկի և ԱՄՆ Միջազգային զարգացման գործակալության (USAID) աջակցությամբ Հայաստանում իրականացվող ծրագրերը, սակայն ՀԲ հայաստանյան ներկայացուցչության ղեկավար Ժան Միշել Հապիին խորհուրդ տվեց օրինակ վերցնել USAID-ից, որը մեր երկրում իրականացնում է դրամաշնորհային ծրագրեր:
«ՀԲ տրամադրած գումարները ՀՀ կառավարության բյուջետային միջոցներ են, պետական փող է, որ կոպեկ առ կոպեկ վերադարձնում ենք, իսկ USAID-ի միջոցները ԱՄՆ կառավարության միջոցներն են, և մենք շատ չենք միջամտում, թե դրանք որ ուղղությամբ են ծախսվում»,- ասաց Տ. Դավթյանը:
Ժ. Մ. Հապին թվարկեց ՀԲ աջակցությամբ մեր երկրում իրականացված և իրականացվող ծրագրերը. «Էլեկտրոնային հասարակություն՝ հանուն մրցակցության և հավասարության» ծրագրի շրջանակներում մի քանի ծրագրեր են ֆինանսավորվում՝ «Համակարգիչներ բոլորի համար», Գյումրու տեխնոպարկը, Ձեռնարկությունների ինկուբատորի հետ հիմվել է mobile լուծումների լաբորատորիա:
Ժ. Մ. Հապին ՏՏ ոլորտի զարգացման տեսանկյունից նշեց 3 խնդիր՝ ծառայություների որակը, ՓՄՁ-ների համար ՏՏ ոլորտը շատ անգամ հասանելի չէ, հատկապես Երևանից դուրս, ինչպես նաև, ըստ Ժ. Մ. Հապիի, շատ կարևոր է, որ Հայաստանը տարածաշրջանում իրեն դիրքավորի որպես ՏՏ ոլորտի առաջնորդ:
USAID-ի հայաստանյան առաքելության տնօրեն Ջաթինդեր Չիման նշեց, որ «Մրցունակ մասնավոր հատված» ծրագրից (CAPS) հետո իրենք սկսում են նոր ծրագիր՝ «Ձեռնարկությունների զարգացում և շուկայի մրցունակություն» (EDMC) ծրագիրը, որը նույնպես աջակցություն կցուցաբերի ՏՏ ոլորտին:
