Ինչպես հայտնում է BBC–ն, Սպիտակ տունն իր անհանգստությունն է հայտնել Եգիպտոսում տեղի ունեցող դեպքերի կապակցությամբ: «Եգիպտոսում կատարվածը չպետք է ազդի նոյեմբերին տեղի ունենալիք ընտրությունների և երկրում ժողովրդավարություն հաստատելու գործընթացի վրա»,- ասվում է Սպիտակ տան հայտարարության մեջ:
Այդ փաստաթղթում նաև ասվում է, որ ԱՄՆ-ը շարունակում է հավատալ, որ փոքրամասնությունների, այդ թվում՝ քրիստոնյա ղպտիների իրավունքները կհարգվեն, և բոլորը կունենան խաղաղ ցույցեր կազմակերպելու և դավանանքի ազատության իրավունք:
Հիշեցնենք, որ կիրակի օրը՝ երեկոյան բախումներ են տեղի ունեցել Կահիրեի հեռուստակենտրոնի շենքի մոտ: Ղպտիները բողոքել են Ասուան մարզում անցյալ շաբաթ մուսուլմանների կողմից քրիստոնեական եկեղեցու հանդեպ իրականացված ոտնձգությունների դեմ: Բացի այդ, նրանք մեղադրել են պետական հեռուստաընկերությանը՝ հակաքրիստոնեական հուզումներ հրահրելու մեջ և կոչ արել զինվորական խորհրդին՝ հրաժարական տալ: Տեղի ունեցած բախումներում զոհվել է առնվազն 24, վիրավորվել՝ 213 մարդ: Կահիրեում մտցվել է պարետային ժամ: