Իրանը իրավական հիմքեր չունի C-300 համակարգերի հարցով միջազգային արբիտրաժային դատարան դիմելու համար. այս մասին հայտարարել է Ռուսաստանի արտաքին գործերի նախարար Սերգեյ Լավրովը` պատասխանելով «Պրոֆիլ» թերթի այն հարցին, թե ինչ է նա մտածում Թեհրանի կողմից Ռուսաստանին այդ համակարգերը չտրամադրելու համար դատի տալու մասին:
«Մեր գնահատականներով` Թեհրանը նման հիմքեր չունի: Կանխավճարը նրանց հետ է վերադարձվել, և մենք կարծում ենք, որ այդ հարցը պետք է փակվի ու այլևս չշահարկվի»,- ասել է նախարարը: Հիշեցնենք, որ 2007 թ. Իրանն ու Ռուսաստանը ստորագրել էին պայմանագիր, համաձայն որի՝ ռուսական կողմը պետք է Իրանին վաճառեր C-300 հակահրթիռային պաշտպանության համակարգեր: Պայմանագրի արժեքը 800 միլիոն դոլար էր: Սակայն 2010 թ. ՌԴ նախագահ Մեդվեդևը չեղյալ հայտարարեց այդ պայմանագիրը, իսկ կանխավճարը վերադարձվեց: Որպես պատճառաբանություն՝ նշվում էր ՄԱԿ-ի Անվտանգության խորհրդի կողմից Իրանի դեմ սահմանված պատժամիջոցների վերաբերյալ բանաձևի պահանջների կատարումը:
