Տեխնիկական նորարությունների` բջջային հեռախոսների և պլանշետների նկատմամբ հակվածությունը կարող է բացասական հետևանքներ ունենալ: Բժիշկները զգուշացնում են, որ գնալով ավելի շատ մարդիկ են սկսել բողոքել վզի հատվածում ցավերից` բջջային հեռախոսի օգտագործումից հետո, քանի որ SMS գրելիս հարկ է լինում խոնարհել գլուխը հեռախոսի վրա: Ինչպես գրում է բրիտանական The Telegraph պարբերականը, դա դարձել է համաշխարհային համաճարակ:
Եթե մարդը երկար տարիներ նույն դիրքով է նստում , դա կարող է հանգեցնել հոդերի լուրջ խնդիրների, քանի որ մկանները հարմարվում են այդ դիրքին, և արդեն դժվար է դառնում ուղղել վիզը: Հետևաբար ցավեր են առաջանում ձեռքերի, ուսերի և գլխի հատվածում:
«Այսպիսի խանգարումները զարգանում են, քանի որ վիզը չի կարող երկար մնալ խոնարհված վիճակում: Արդյունքում կորչում է վզի բնական դիրքը»,- մեկնաբանում են բժիշկները:
Բժիշկները զգուշացնում են, որ հատկապես մեծ վտանգի են ենթարկվում փխրուն մարմին ունեցող կանայք և երեխաները: Վտանգից խուսափելու միակ միջոցը ուսերն ուղղող հաճախակի վարժություններն են: Բացի այդ, հեռախոսը կարելի է ավելի բարձր պահել` որպեսզի գլուխը խոնարհելու կարիք չլինի:
