Այս տարի ԴիջիԹեք 7-րդ միջազգային տեխնոլոգիական ցուցահանդեսի շրջանակներում իր մուտքը Հայաստան հայտարարեց լիտվական ՏՏ մատակարար «Ակմե Քոմփյութեր Քոմփոնենթս» (ACC) ընկերությունը, որը ներակայացնում է համաշխարհային առաջատար արտադրողների` ASUS, DELL, LG, BenQ, Sony, Philips, D-Link և այլն: Լրագրողների հետ հանդիպման ժամանակ ՀՀ-ում Լիտվայի դեսպան Գեդրյուս Ապուոկասը գոհունակություն հայտնեց երկու երկրների քաղաքական հարաբերություններից և նշեց, որ այսօր արդեն առաջընթաց է արձանագրվում տնտեսական ոլորտում՝ առաջին լիտվական ընկերությունը մուտք է գործում հայաստանյան շուկա:
ACC ընկերության գլխավոր գործադիր տնօրեն Ռեգիմանտաս Բուոզիուսը տեղեկացրեց, որ իրենք ձեռք են բերել «Մաքստրոնիկ» ՓԲԸ-ն, որը կդառնա ընկերության 7-րդ մասնաճյուղը Արևելյան Եվրոպայում: ACC-ն ներկայացված է Լատվիայում, Էստոնիայում, ՌԴ-ում, Վրաստանում, Բելառուսում: Ռ.Բուոզիուսը նշեց, որ թեև հայկական շուկան ուսումնասիրում են դեռ 2006թ.-ից, սակայն որոշել են միայն այս տարի մուտք գործել, քանի որ նկատում են որոշ դրական միտումներ:
Ռ.Բուոզիուսի խոսքով՝ Լիտվայի ու Հայաստանի բնակչությունը գրեթե հավասար է՝ 3 մլն, բայց Լիտվայում անցած տարի իրացվել է 103 հազար նոութբուք, իսկ ՀՀ-ում՝ 25 հազար, այսինքն՝ հնարավորությունները մեծ են: Պատասխանելով «Առաջին լրատվականի» հարցին, թե ամեն դեպքում բնակչության գնողունակությունը ՀՀ-ում ցածր է, ի՞նչ հատուկ առաջարկ ունեք, որով կկարողանաք գրավել սպառողներին, Ռ.Բուոզիուսը նշեց, որ աճի շատ մեծ ներուժ են տեսնում, կիրառելու են վարկային քաղաքականություն, փորձելու են զարգացնել շուկան, քանի որ այն ինքն իրեն չի զարգանում, ինչպես նաև աշխատելու են մեծածախ գնորդների հետ:
«Մեր նպատակն է 1-2 տարիների ընթացքում առաջատար դիրքեր գրավել այստեղ»,- ասաց Ռ.Բուոզիուսը:Ս
