«Հստակ չեմ կարող ասել` պե՞տք է արդյոք, որ Հայ ազգային կոնգրեսը շարունակի իր շուրջօրյա հանրահավաքները, թե ոչ, սակայն հստակ է, որ ընդդիմությունը պետք է որոշի իր կոնկրետ նպատակներն ու անելիքները»,- «Առաջին լրատվական»-ի հետ զրույցում ասաց Ռազմավարական և ազգային հետազոտությունների հայկական կենտրոնի փորձագետ Մանվել Սարգսյանը:
Նրա խոսքով՝ ՀԱԿ-ն իշխանությունների հետ հարաբերվելու նոր մեխանիզմների մշակման անհրաժեշտություն ունի: «Սակայն ամենակարևորը ընդդիմության կոնկրետ նպատակն է: Եթե այդ նպատակն իշխանությունների հետ երկխոսությունը վերսկսելն է, այդ ուղղությամբ ևս նոր քայլեր պետք է մտածվեն: Իշխանությունները ՀԱԿ-ին զիջումներ չեն անում, և եթե զիջումներ չկան, ապա պետք է վարչակարգի վրա ազդելու նոր միջոցներ փնտրել»,- ամփոփեց փորձագետը:
Հիշեցնենք, որ այսօր` հոկտեմբերի 7-ին, լրանում է ՀԱԿ հայտարարած շուրջօրյա հանրահավաքների յոթերորդ օրը: Ազատության հրապարակում շուրջօրյա հանրահավաքներ անցկացվում են անցած ուրբաթ օրվանից:
