«Անձավաբուժությամբ բուժվում են մի շարք շնչառական և ալերգիկ հիվանդություններ»,- այսօր լրագրողների հետ հանդիպման ժամանակ տեղեկացրեց ՀՀ առողջապահության նախարարության գլխավոր թոքաբան, հանրապետության վաստակավոր բժիշկ, պրոֆեսոր Անդրանիկ Ոսկանյանը` խոսելով շնչառական հիվանդությունների և անձավաբուժության մասին: Տեղեկացնենք, որ անձավաբուժությունը Հայաստանում ձևավորվել է 80-ական թվականներին: «Բուժում է շնչառական հիվանդությունը: Սա համեմատաբար նոր ուղղություն է բժշկության մեջ: Քանի որ բոլոր հիվանդությունների հիմքում ընկած է իմունային համակարգի խաթարումը, անհրաժեշտ է օրգանիզմի իմունային վիճակը բարձրացնել. անձավը օրգանիզմին տալիս է իմունային հանգստություն»,- մասնավորեցրեց բժիշկը`ընդգծելով, որ Հայաստանում կա նմանատիպ անձավ` Ավան համայնքում:
Ըստ Ա. Ոսկանյանի` անձավում մի որոշ ժամանակ ապրում է մարդը և «ազատվում բոլոր կյանքային գրգռիչներից»: «Երբ իմունային համակարգը կարգավորվում է, սկսում է ինքը պայքարել հիվանդության դեմ, սա կոչվում է ռեկրեցիա` վերականգնում հանգստի միջոցով: Հայաստանում այդ բուժումը ունի բժշկական լիցենզիա»,- ասաց բժիշկը`տեղեկացնելով, որ այս կերպ բուժվում են բրոնխիալ ասթման, բոլոր ալերգիկ հիվանդությունները, թոքերի հետ կապված խրոնիկ հիվանդությունները` բացառությամբ թոքախտի և սուր հիվանդությունների: Բուժումը տեղի է ունենում 235 մետր խորության տակ, քսան օր, օրական` վեց ժամով, հետո բժիշկը տալիս է հատուկ ցուցումներ:
Անդրադառնալով եղանակային փոփոխություններին` բժիշկը մի քանի ցուցումներ տվեց` ասելով, որ
պետք է ճիշտ նախապատրաստվել, պետք է ունենալ առողջ ապրելակերպ, օրինակ` ծխողի մոտ ավելի շուտ են առաջանում շնչառական հիվանդություններ: «Առաջին հերթին շնչառական և ինֆեկցիոն հիվանդություններն են գլուխ բարձրացնում` եղանակային փոփոխություններից»,- բացատրեց Ա. Ոսկանյանը` հավելելով, որ երբ ջերմությունը բարձրանում է, սկսվում է հաղթահարվել հիվանդությունը, պետք չէ փորձել խեղդել բարձր ջերմաստիճանը: Բժիշկը խորհուրդ տվեց վստահել միայն այն բժշկական կազմակերպությանը, որն ունի բժշկական լիցենզիա:
Նա նաև խոսեց բժիշկների հանդեպ անվստահությունից` ասելով, որ դա պատճառաբանված է: «Բժիշկների հանդեպ անվստահությունը հիմքեր ունի, բայց ոչ այն պատճառով, որ նրանք չունեն անհրաժեշտ պայմաններ»,- մեկնաբանեց Ա. Ոսկանյանը`ասելով, որ բժշկի Հիպոկրատի երդումն ունի մի քանի ուղղություն. պետք է ճշտել հիվանդությունը` նոր բուժել, բուժման ժամանակ չունենալ ինտիմ հարաբերություն` հիվանդի կամ նրա հարազատների հետ: Ըստ պրոֆեսոր Ա. Ոսկանյանի` բժիշկների մեծ մասը բժիշկ կոչվելու իրավունք չունի:
