Ադրբեջանական APA լրատվական գործակալությանը տված հարցազրույցի ժամանակ Եվրոպայի և Ասիայի հարցերով ԱՄՆ պետքարտուղարի տեղակալի օգնական Էրիկ Ռուբինն անդրադարձել է ԱՄՆ-ի ու Ադրբեջանի փոխհարաբերություններին.
«ԱՄՆ-ը մեծ նշանակություն է տալիս անվտանգության, էներգետիկ, ժողովրդավարական ու տնտեսական բարեփոխումների ոլորտներում Ադրբեջանի հետ ռազմավարական գործընկերությանը։ Ոչ վաղ անցյալում դեսպան Բրայզան ընդգծեց, որ ԱՄՆ-Ադրբեջան ռազմավարական գործընկերությունն ամուր է և էլ ավելի է ամրագրվում։ Նրա հետ անհնար է չհամաձայնել։
ԱՄՆ-ը բարձր է գնահատում միջազգային անվտանգության ոլորտում Ադրբեջանի ջանքերն ու ներդնումը։ Ամերիկացի և ադրբեջանցի զինծառայողները համատեղ կանգնած են Իրաքում, Կոսովոյում, իսկ ադրբեջանցի 90 զինծառայողներ էլ գտնվում են Աֆղանստանում։ Ադրբեջանը կարևոր դեր է խաղում դեպի Աֆղանստան զորքերի փոխադրման և նրանց ոչ ռազմական բեռներ մատակարարելու հարցում։
ԱՄՆ-ը նաև աջակցում է ադրբեջանական գազի՝ դեպի Եվրոպա փոխադրման երթուղիների դիվերսիֆիկացմանն ուղղված ադրբեջանական իշխանությունների ջանքերին և աջակցում է «Հարավային միջանցքի» զարգացմանը։ ԱՄՆ-ը վստահ է, որ ժողովրդավարական ու տնտեսական բաեփոխումները լավագույնս կծառայեն Ադրբեջանի ապագա կայունությանն ու բարգավաճմանը»։