Նյու Յորքը 4 տարվա մեջ առաջին անգամ դարձել է անշարժ գույքի ոլորտում ներդրողների համար ամենաշահավետ քաղաքը` իրենից ետ թողնելով Լոնդոնին: Ինչպես հաղորդում է Bloomberg գործակալությունը, վկայակոչելով Cushman & Wakefield Inc. հետազոտական ընկերության տվյալները, Նյու Յորքում անշարժ գույքի բնագավառում կատարվող ներդրումները 12 ամսում աճել են 166%-ով` հասնելով 29.7 մլրդ դոլարի: Մինչդեռ Լոնդոնի անշարժ գույքի բնագավառում ներդրված գումարների ծավալը աճել է 2.4%-ով` կազմելով 27.2 մլրդ դոլար:
Նյու Յորքից և Լոնդոնից բացի, անշարժ գույքի ամենաարագ աճող շուկաների ցանկում են հայտնվել Չիկագոն, Բոստոնը, Ֆրանկֆուրտը:
Գործակալությունը նշում է, որ եվրագոտու խնդիրների հետ կապված ներդրողների մտավախությունների ֆոնին ձեռնարկատերերը փնտրում են ավելի անվտանգ ակտիվներ, որոնցից մեկն էլ դարձել է անշարժ գույքը:
Ավելի վաղ Bloomberg-ը հաղորդում էր, որ 2008թ. համաշխարհային ճգնաժամի հնարավոր կրկնության շուրջ ներդրողների մտավախությունների պատճառով Լոնդոնում էլիտար բնակարանները մի քանի անգամ թանկացել են:
Knight Frank հետազոտական ընկերության համաձայն` Լոնդոնում լյուքս կարգի բնակարանների գինը սեպտեմբերին հասել է տարեկան մաքսիմումին` նախորդ տարվա նույն ժամանակահատվածի համեմատությամբ:
Գործակալությունը տեղեկացնում է, որ Լոնդոնի կենտրոնում էլիտար անաշարժ գույքը շարունակում է մնալ ցանկալի ակտիվ օտարերկրացիների համար:
