Ռուսական Regnum լրատվական գործակալությանը տված հարցազրույցի ժամանակ ԱՊՀ-ի ինստիտուտի հայկական մասնաճյուղի տնօրեն, քաղաքագետ Ալեքսանդր Մարկարովն անդրադարձել է Ֆրանսիայի նախագահ Նիկոլա Սարկոզիի առաջիկա հարավկովկասյան շրջագայությանը.
«Տարածված այն լուրերը, թե հնարավոր է՝ Ֆրանսիան Ռուսաստանից վերցնի Ղարաբաղյան հակամարտության կարգավորման հիմնական միջնորդի դերը, կրում են համատեքստային բնույթ Ռուսաստանում տեղի ունեցող քաղաքական գործընթացի ֆոնին, որ կապված է այդ երկրի առաջիկա նախագահական ընտրությունների հետ։
Մինչև Ռուսաստանի նախագահական ընտրությունների ավարտն ընկած ժամանակահատվածում Ղարաբաղյան հակամարտության կարգավորման գործընթացում հիմնական միջնորդի դերում կարող է հանդես գալ Ֆրանսիան։ Պետք է հաշվի առնել, որ Ռուսաստանի նախագահի մասնակցությամբ Հայաստանի ու Ադրբեջանի միջև տարված բանակցություններն էական արդյունք չեն տվել։
Հաշվի առնելով այդ ամենը՝ պետք է նշել, որ Ֆրանսիան կա՛մ Բաքվի ու Երևանի համար պատրաստելու է ընդունելի առաջարկների փաթեթ, որը պետք է համաձայնեցված լինի ԵԱՀԿ Մինսկի խմբի մյուս համանախագահող երկրների (Ռուսաստան և ԱՄՆ) հետ, կա՛մ դա կլինի բանակցությունների հերթական փուլ, որում ֆրանսիական կողմը ժամանակավորապես կստանձնի Հայաստանի ու Ադրբեջանի նախագահների հանդիպումը կազմակերպողի գործառույթները։
Ապագայում Ղարաբաղյան բանակցային գործընթացում էական փոփոխություններ չեն գրանցվի, քանի որ անհասկանալի է, թե ինչ նոր բան կարող է Սարկոզին առաջարկել հակամարտող կողմերին»։
