Երեկ Ռուսաստանը և Չինաստանը ՄԱԿ-ի ԱԽ-ում Սիրիայի հարցով բանաձևի քվեարկության ժամանակ վետո են կիրառել ընդդեմ դրա ընդունման, որից հետո այդ կազմակերպությունում Ռուսաստանի և ԱՄՆ մշտական ներկայացուցիչներն իսկական լեզվակռիվ են սկսել` լրագրողների հետ հանդիպմանը մեկը մյուսի հասցեին մեղադրանքներ տեղալով:
Այսպես, ՄԱԿ-ում ԱՄՆ մշտական ներկայացուցիչ Սյուզան Ռայսը հայտարարել է, թե Անվտանգության խորհուրդը մերժել է ընդունել տարածաշրջանային անվտանգությանը սպառնացող վտանգն այն պատճառով, որ որոշ երկրներ «նախընտրում են զենքի առևտուր անել սիրիական ռեժիմի հետ»: Այս մասին հաղորդում է «Ազատություն» ռադիոկայանը: Նա չի մանրամասնել, թե կոնկրետ որ երկրներին նկատի ունի, սակայն ակնհայտ է, որ խոսքը Ռուսաստանի և Չինաստանի մասին է, որոնք ավանդաբար լավ կապեր ունեն Սիրիայի իշխանությունների հետ:
Դրանից հետո ՄԱԿ-ում Ռուսաստանի ներկայացուցիչը` Վիտալի Չուրկինը, հերքել է վետոյի կիրառման նման բացատրությունը։ «Ռուսաստանը սկզբունքային դիրքորոշում ունի, և նրանք, ովքեր աշխատում են ՄԱԿ-ում, գիտեն, որ որոշ դեպքերում Ռուսաստանը պաշտպանում է ԱԽ-ի այնպիսի բանաձևեր, որոնք տնտեսական և զենքի վաճառքի առումով լուրջ վնասներ են հասցնում նրան»,- ասել է Չուրկինը: Նա տարօրինակ է համարել այն, որ Ռուսաստանին զենքի վաճառքի մեջ մեղադրում է մի երկիր, որը Մերձավոր Արևելքին հարյուր միլիարդավոր դոլարների զենք է մատակարարում: Բացատրելով Ռուսաստանի դիրքորոշումը` Չուրկինն ասել է, որ բանաձևում չի արտացոլվել Ռուսաստանի մտահոգությունը, այլ ներառվել էր մի կետ, որ եթե Սիրիայի իշխանությունները չդադարեցնեն բռնություններն ընդդիմության դեմ, ապա 30 օրվա ընթացքում պետք է պատժամիջոցներ կիրառվեին այդ երկրի դեմ: Տեքստում չէր խոսվել նաև արտաքին միջամտության անթույլատրելիության մասին:
