ԱՄՆ-ը 10 մլն դոլար պարգև է նշանակել «Ալ-Կաիդայի» առաջնորդներից մեկի`Իբրահիմ Ավվադա Իբրահիմ ալ-Բադրիի (Աբու Դուա) մասին յուրաքանչյուր տեղեկության համար, որը կօգնի ձերբակալել նրան: Ենթադրվում է, որ նա այժմ Իրաքում է: Այս մասին հաղորդում է France-Presse-ը:
Աբու Դուան մի քանի տարի եղել է «Ալ-Կաիդայի» ղեկավարներից: Այն բանից հետո, երբ մայիսին սպանվեց Օսամա Բեն Լադենը, նա խոստացավ, որ վրեժ կլուծի՝ ամեն հնարավոր միջոցներով: Բացի դրանից, նա իր վրա էր վերցրել Իրաքում տեղի ունեցած մի քանի ահաբեկչությունների պատասխանատվությունը, որոնց ժամանակ զոհվել էին տասնյակ մարդիկ:
Ամերիկյան իշխանությունների տվյալներով՝ Աբու Դուան պատասխանատու է Բաղդադում գտնվող Ումմ ալ-Կուրա մզկիթի վրա կազմակերպված գրոհի համար, որը տեղի է ունեցել 2011 թ. օգոստոսին: Այդ հարձակման ընթացքում զոհվել էր 28 մարդ, որոնց թվում՝ նաև Իրաքի խորհրդարանի պատգամավոր Հալիդ ալ-Ֆահդավին: