ԵԽԽՎ հայաստանյան պատվիրակությունը չի մասնակցել երեկ այդ կառույցում տեղի ունեցած Լեռնային Ղարաբաղի հարցով ենթահանձնաժողովի նիստին: «Առաջին լրատվականի» հետ զրույցում այս մասին տեղեկացրեց ԵԽԽՎ պատվիրակության անդամ Նաիրա Զոհրաբյանը:
Նրա խոսքով՝ չնայած հայկական պատվիրակությունը Բյուրոյի դեռ հունվարյան նստաշրջանում գրավոր և բանավոր զգուշացրել էր, որ իր համար անընդունելի է ԵԽԽՎ մանդատի ներքո նման ենթահանձնաժողովի վերակենդանացումը, այդուհանդերձ պատկերացնում էր, որ իր նախագահության ընթացքում ազգությամբ թուրք Մևլութ Չավուշօղլուն պետք է անի ամեն ինչ` Լեռնային Ղարաբաղի հարցում հակահայ բանաձև ստանալու համար:
«Ուստի երեկ` հոկտեմբերի 3-ին, նա կրկին ենթահանձնաժողովի նիստ էր նշանակել: Հատկանշական է, սակայն, որ մինչև նիստը` առավոտյան մեր պատվիրակությունը կրկին նշեց, որ հայկական կողմը չի մասնակցելու ԼՂՀ հարցով ենթահանձնաժողովի նիստին: Մենք, բնականաբար, նիստին չմասնակցեցինք: Այն տևել է 20-25 րոպե, բովանդակային քննարկումներ չեն եղել, և մեր ունեցած տեղեկատվությամբ՝ որոշվել է ենթահանձնաժողովի մասին հարցը կրկին ուղարկել Բյուրո: Բովանդակային քննարկում չէր էլ կարող լինել, որովհետև մենք բազմիցս նշել ենք, որ բանակցությունները փակ են և բանակցային գործընթացին ԵԽԽՎ այդ հանձնաժողովի ոչ մի անդամ տեղյակ լինել չի կարող: Ինձ թույլ կտամ ենթադրել, որ ԼՂՀ ենթահանձնաժողովի հարցը հենց Բյուրոյում էլ կթաղվի, որովհետև այս նստաշրջանը Չավուշօղլուի համար վերջինն է»,- նկատեց Նաիրա Զոհրաբյանը:
Նա նաև տեղեկացրեց, որ ԵԽԽՎ նախագահի պաշտոնը հունվարից կստանձնի ֆրանսիացի պատգամավոր Ժան Կլոդ Մինյոնը: «Հույս ունեմ, որ նա խոհեմություն կունենա հասկանալու, որ նման ենթահանձնաժողովը վնասում է ղարաբաղյան բանակցային գործընթացին: Ենթադրում եմ, որ ԼՂՀ հարցով ենթահանձնաժողովի նոր նիստ այլևս չի գումարվի»,- ընդգծեց ԵԽԽՎ հայաստանյան պատվիրակության անդամը:
Նշենք, որ ԵԽԽՎ նախագահի պաշտոնը կուսակցություններին փոխանցվում է ռոտացիոն կարգով: Հոկտեմբերի 3-ին հենց այս կարգով, ձայների մեծամասնությամբ է Մինյոնը նշանակվել ԵԽԽՎ նախագահի պաշտոնում:
Հիշեցնենք նաև, որ ԵԽԽՎ Բյուրոն 2011-ի հունվարի 28-ի նիստում նախագահ Մեվլութ Չավուշօղլուի հավանությամբ որոշել էր վերականգնել ենթահանձնաժողովը, որի նոր նախագահ էր դարձել իսպանացի Խորդի Խուգլա ի Կոստան:
